Tienda di Ley a pone enfasis den e prome dos articulonan cu a wordo publica con ta obtene e nacionalidad Hulandes ‘van rechtswege’ esta segun ley. Nos a elabora riba e articulonan 3 te cu articulo 5 di e Rijkswet Nederlanderschap. Despues di esei nos a continua cu e posibilidad di adkiri e nacionalidad Hulandes mediante optieverklaring.
Pa e procedura di optieverklaring e persona no mester haci ningun examen. Den e edicion aki PHP lo elabora specificamente riba e basenan pa haya e nacionalidad Hulandes door di naturalisacion. E articulo aki lo splica e rekisitonan cu e ciudadano mester cumpli cune y e procedura mara na e naturalisacion.
E procedura di naturalisacion ta haya su base den articulo 7, 8 y 9 di e Rijkswet op het Nederlanderschap. Nos lo usa e letternan RWN den e articulo aki pa sigui referi na e ley corespondiente. Ta bon pa remarca cu e ley cu ta reglamenta nacionalidad Hulandes ta un Rijkswet (ley di Reino) y cu nacionalidad Hulandes ta un asunto di Reino Hulandes. Manera articulo 7 RWN ta splica, e nacionalidad Hulandes ta wordo otorga na e ciudadano cu solicita pa ricibi esaki a base di e leynan den e Rijkswet. E nacionalidad Hulandes ta wordo otorga na e solicitante, a base di articulo 7 RWN, si e solicitante cumpli cu e rekisitonan menciona den articulo 8 RWN. Den e articulo aki nos ta menciona algun scenario cu kizas lo ta esunnan mas interesante pa esnan na Aruba. Pa un lista no limitativo cual ta contene tur e categoria nan nos ta referi na articulo 7, 8 y 9 RWN den su totalidad.
Articulo 8 inciso 1 RWN ta trece cinco punto basico dilanti pa bin na remarca pa adkiri e nacionalidad Hulandes. Nos ta pone enfasis riba e hecho cu e rekisitonan aki ta acumulativo nificando cu mester cumpli cu tur.
a) E solicitante mester ta mayor di edad;
b) Di cual no tin duda algun cu e solicitante lo keda residencia na Aruba, of na un di e paisnan Europeo, pa un tempo indefini;
c) Prome cu e solicitante aplica pa e nacionalidad Hulandes, e mester tabata bibando legalmente na Aruba, of un di e paisnan Europeo, pa por lo menos 5 aña consecutivo na momento di hasi e peticion. Riba e regla aki tin algun excepcion como por ehempel:
Den caso cu bo ta casa cu un homber of muhe di nacionalidad Hulandes of ta pareha registra (geregistreerd partner) di un homber of muhe cu tin e nacionalidad Hulandes. Den un caso asina e solicitante por haci e peticion di naturalisacion despues di ta 3 aña casa of di ta bibando como pareha registra. Tambe e solicitante cu ta bibando 3 aña hunto cu su pareha Hulandes y sin interupcion a base di un acuerdo legal (samenlevingsovereenkomst) por entrega un peticion di naturalisacion.
d) Y cu ta wordo considera di ta estableci na Aruba door di e hecho cu e solicitante tin algun tipo di nivel di conocemento di e idioma Hulandes y Papiamento (papia, lesa, scirbi y compronde), pero tambe tin algun conocemento di e sociedad di Aruba. Bo conocemento di e idiomanan y sociedad lo wordo comproba a traves di un test;
e) E nacionalidad Hulandes ta wordo entrega na e solicitante despues cu e solicitante declara di ta dispuesto pa duna un declaracion di conexion (verbondenheid). Despues cu e declaracion aki tuma lugar e solicitante lo adkiri e nacionalidad Hulandes.
Si bo persona ta cumpli cu e rekisitonan menciona, bo por tuma contacto cu Gabinete di Gobernador pa cuminsa bo procedura.
Tres scenario den cual un peticion por wordo nenga aunke ta cumpli cu e rekisitonan necesario:
E peticion di e solicitante, cu ta cumpli cu e rekisitonan di articulo 7 y 8 di e Rijkswet, por wordo nenga den tres scenario segun articulo 9 inciso 1 RWN:
a) A base di e conducta di e solicitante si tin sospechonan suficiente valido cu e lo por ta un peliger pa e orden publico, pa e moralidad of e siguridad di e Reino Hulandes;
b) E solicitante cu ta dispone di un otro nacionalidad, di cual e solicitante no a hasi lo posibel pa renuncia esaki of cu no ta dispuesto pa hasi lo posibel pa renuncia na esaki despues di a naturalisa, al menos cu esaki no por pordo exigi di e solicitante;
c) E solicitante, di cual un di e excepcionan di articulo 8 inciso 2 RWN ta vigente, cu tin su residencia principal den e pais di cual e ta un cuidadano.
Articulo 9 inciso 5 RWN ta menciona cu nos Minister por tuma decisionnan pa rechasa of wanta e peticionnan tocante e otorgamento di e nacionalidad Hulandes. Tienda di Ley kier enfatisa cu a trata mas tanto posibel na splica e articulonan aki den Papiamento pero no tur biaha tin palabranan huridico exacto cu por wordo usa. Ta spera cu por a informa e lector un poco tocante e topico aki. Si bo persona tin pregunta of ta desea asistencia huridico por tuma contacto cu nos via nos facebook page of nos e-mail: [email protected].
