Peru lo bay expulsa mey centenar di ciudadano Venezolano, cu antecedentenan policial pa nan pais, cu nan a ingresa den teritorio local falsificando nan informacion migratorio, unda cu ta constitui e prome medida di e tipo aki di parti di autoridadnan, gobierno a señala dialuna.
E mey centenar di Venezolano lo wordo repatria den un avion di Forza Aereo di Peru, bao di custodia di polis Peruano y den coordinacion cu autoridadnan di Caracas, e ministerio di Interior a indica, segun AFP.
“E intervenidonan a falsifica informacion ora di tramita nan Permiso Temporal di Permanencia, señalando cu nan no tabata conta cu antecedentenan policial di nan pais, loke ta nifica un falta na e articulo 58 di e Ley di Migracion, cual tin como sancion expulsion,” E ministerio di Interior a señala riba su cuenta di Twitter, ora id hustifica e decision.
E Venezolanonan a wordo deteni durante e marduga di dialuna, den barionan periferico di e capital Peruano, den cuadro di un operaicon policial.
Ta e prome expulsion di migrantenan Venezolano cu autoridadnan local ta realisa desde cu Peru a converti den un di e mecanan di refugio di esakinan den e region.
E medida ta coincidi cu e creciente denuncianan di robo y asalto na Lima,lansa contra di e ciudadanonan Venezolano. E denuncianan aki a genera reaccionnan xenonofa contra e migrantenan di e origen aki.
E percepcion na Lima, unda cu ta biba mas of menos un 10 miyon di persona, ta cu tin un relacion entre e aumento di delincuencia y e presencia masivo di Venezolanonan, segun un sondeo di Ipsos, divulga dialuna a e corant El Comercio.
E principal organisacion di Venezolanonan na Peru, a admiti cu delincuentenan a yega entre e migrantenan.
“Esey ta inegabel,” e exdiputado Venezolano Oscar Perez a bisa, cita pa El Comercio den referencia na e presencia di delincuentenan.
“Sin embargo, mester tin e responsabilidad dilanti e percepcion aki, pasobra pa cada mal migrante di Venezuela, tin miles cu a bin Peru pa haci cosnan bon, di manera decente, buscando e oportunidadnan cu e regimen di Maduro a nenga nos,” Perez, kende ta encabesa e ONG Union Venezolano na Peru, a bisa na e corant Limeño.
Door di e crisis na Venezuela, mas di 730 mil Venezolano a yega Peru den e ultimo tres añanan, segun Migraciones, y cada dia ta ingresa un promedio di 1500.
Peru ta proyecta cu na fin di April lo bay tin casi 800 mil Venezolano den e pais y e barera di e miyon lo wordo supera den poco luna si mantene e actual fluho.
Esaki ta e di dos pais cu a ricibi mas Venezolano despues di Colombia (1.2 miyon), loke a nifica un carga pisa pa e servicionan publico Peruano.
