Algun habitante cu a pasa na Calabas a yama Polis ora cu nan a mira un señora su so na cas diasaba merdia. Un señora di edad. A bisa cu e señora di edad no tin coriente y tampoco awa. Polis a yega na e adres y topa cu e señora. Polisnan a pidi e señora pa drenta su veranda. Polis mes a rek un stoel pone den veranda y sinta combersa cu e señora. E otro agentenan a bay chek cu bisiñanan cu ta tambe famia. A chek den e cas pa coriente y awa y tabata tin coriente cu awa.
Kiermen e yamada cu Polis a haya cu e señora ta bibando sin awa y coriente no ta klop. Asina mes e polisnan a tuma diez minuut pa sinta trankil cu e señora y hacie algun pregunta. Por a mira claramente cu e señora tin demencia. E ta combersa pero hopi cos no ta klop. E señora a keda masha contento cu Polis a bin cerca dje pasobra e no sa haya bishita. Algun familiar cu a mira presencia di Polis na e cas a core yega. Nan a splica di e señora su problema. Tambe nan a bisa cu nan ta tira bista riba dje. Hasta nan tin e porta di veranda na candal. Polis mester a bula e cura di veranda pa drenta. E porta di veranda ta na candal pa asina e señora no sali. Dos biaha anochi laat a haya e señora riba caya te cu el a cay.
Mientrastanto despues di un combersacion ameno, Polis a bisa e señora cu nan lo bolbe si e tin mester di cualkier yudansa. Nan ta Polis di Noord y si e mester di yudansa pa cambia bombiyo, drecha algo na cas etc, nan cu ta Polis di Noord tey pa yude. Famia cu a yega tambe a gradici Polis pa e bishita. Interesante tabata pa scucha un tiki di historianan di pasado for di e señora durante e bishita di Polis. El a conta Polis diferente cos interesante con e tabata traha antes entre otro na La Linda unda el a siña hopi. Segun bisiñanan ta dificil pa saca e señora for di e cas pa asina e haya yudansa den un hogar cu cuido. E no ta kier bay segun esnan cu conoce.
