Te ainda ta haya e feeling di hopi hende cu ta mira ambulance yega un caminda y ta mira cu e ta keda tarda riba un pashent na e sitio di un accidente, etc. Tin biaha tin e sentimento cu ora ambulance yega, ta djis bent’e riba cama y ta hib’e hospital y esey no ta e caso.
Director di ImSan, dr. Joel Rajnherc, a splica cu tin un dicho na Hulandes cu ta bisa “Hastige spoed, zelden goed.” Esey kiermen cu si bo no wak kico ta pasando y djis hisa benta y baha cu e pashent for di unda bo ta, full speed riba tur sorto di baranca y buraco den caminda tambe, hopi biaha bo ta haci mas daño na e pashent cu bon.
P’esey ImSan a inverti hopi, no solamente placa, sino tambe pasenshi, hopi esfuerso den educa e enfermero y chauffeurnan di ambulance completamente di acuerdo cu e sistema cu nan ta usa na Europa y ImSan ta riba e mesun nivel.
Un Ambulance cu ta yega cerca un pashent, prome cos cu nan ta haci ta evalua e situacion di e pashent. Nan ta haci un diagnostico. Hopi biaha esey ta tuma algo di tempo, ta tuma presion, ta tuma kisas e sucu, ta bay hinca un infuus, bo por cuminsa cu remedi. Tur eseynan ta pa stabilisa e pashent prome cu bo djis bay core cun’e.
Si un persona tin un pia kibra, weso ta casi sali afo, ta haci tremendamente dolor, mester por duna e pashent ey remedi pa calma su dolor, prome cu bay his’e riba un cama y pone den ambulance y core cun’e cu por bay haci’e mas dolor ainda tambe.
Tur e situacionnan ey ta haci cu ta parce cu ta tuma hopi tempo, pero e ta pa mehora e bienestar, e resultado final di e trabao cu ambulance ta haci.
Dr. Rajnherc ta hopi orguyoso cu ta mira e pashentnan ta yega hospital den un miho situacion, miho pa e survival rate di e pashent. Hasta den accidentenan hopi grave, cu mas y mas nos ta mira riba nos careteranan. Mas y mas hende cu mester di no solamente un ambulance, pero dos ambulance ta bay, pa un pashent, pasobra ta kere cu miho cu bo stabilisa e pashent, miho e ta pa e pashent yega y salba su bida.
Personal di ambulance
Te asina leu tin aproximadamente 16 enfermero y 16 pa 18 asistente di enfermeria cu tambe ta e chauffeurnan cu ta riba caya. Tur di nan ta completamente diploma y certifica. Nan a caba di haya un impulso, un empuhe di 7 asistente nobo/chauffeur cu a bin, door cu nan a caba nan entrenamento y a wordo certifica recientemente y ta hopi orguyoso cu henter e team ta riba nivel internacional.
Cada dos aña ta percura cu un grupo di Hulanda bin pa recertifica nan. Esey ta nifica cu prome nan ta haci un assessment, wak con bon nan ta. Nan ta wak unda tin kisas un tiki novedad cu nan a lubida. Nan ta haya training di nobo y despues nan ta haci un examen un biaha mas, pa ta recertifica. Esey tin cu tuma luga cada dos aña.
