Persona pega den auto: Accidente serio riba Green Corridor

A pidi presencia di polis cu urgencia pa un accidente riba caminda grandi di Savaneta, accidente di seriedad cu hende pega den auto.

Esaki a tuma luga den ora tempran di mainta, den careda di 6:00 am, ora cu un auto ( Toyota Yaris blanco ) a bay subi caminda grandi saliendo di Rooi Lamoenchi, no a duna preferencia na e Chevrolet Trax y cu consecuentemente a bay impacta den otro.

Segun por a compronde na sitio, e Toyota Yaris a sali for di Rooi Lamoenchi ( na altura di La Granja) direccion pariba, a subi caminda sin tene cuenta cu di pariba ta bin e Chevrolet Trax riba caminda grandi direccion pabou bayendo Playa. E impacto tabata sumamente fuerte cu a pone cu e Yaris a bay pega p’e otro band’i caminda den un troncon di mata. Mientras e otro vehiculo a dal den un palo di luz.

E chauffeur di e yaris a keda pega den auto. A pidi ambulance y brandweer mesora na sitio mirando e gravedad di e situacion. A traha di biaha pa saca e chauffeur y asina transport’e pa hospital. Tin di bisa cu ambos chauffeur a resulta herida. A presenta un segundo ambulance pa hib’e tambe hopsital.