Na DIMAS a topa cu diferente cliente cu a expresa nan preocupacion pa e forma con ta atendiendo cu permiso di estadia y trabou.
Marian Palacios ta un di e stranheronan cu tin 4 luna wardando riba su permiso y ta buscando un solucion lihe, mirando cu e tin mester di su permiso. Sinembargo no ta dun’e ningun contesta. Diabierna el a logra papia cu e Director di DIMAS, mr. Kathy Paskel, cu a bis’e cu e lo bay mira kico ta pasando cu su permiso. Awe dialuna el a presenta bek na DIMAS pa follow up con a para. E mester di un solucion, segun Palacios.
E tin tres luna sin traha, door cu na e compania cu e ta traha, nan sistema ta pidi pa un permiso valido di tur empleado. E compania a pidi pa e stop di traha te ora cu su permiso sali, debi cu no ta permiti pa e persona traha sin un permiso.
Palacios ta hopi preocupa pasobra e ta mama di un yiu chikito y e tin su responsabilidadnan cu e tin cu cumpli cun’e. Sin conta cu costo di bida na Aruba ta caro. Y pa un hende bay p’adilanti, mester traha. Esey ta loke Palacios ta busca. E ta haci un yamada na Minister Glenbert Croes di Labor, pa traha riba e departamento di DIMAS, pasobra esaki ta di mas! Palacios a bay pa busca un contesta, pero no tin. E no ta compronde con nan ta traha na e departamento aki. El a agrega cu e tin tur derecho pa ta aki, mirando cu su yiu ta Arubiano. El a nace aki. Su yiu ta firma p’e. E prome proceso mes a tarda algun luna, pero no manera e biaha aki, cu ta bay haci casi 5 luna. Awo e tey tur dia na DIMAS pa e por haya un contesta riba peticion di su permiso. Palacios a busca informacion si en caso cu nan purba di deport’e for di nos isla, pero a splik’e cu esey no ta posibel pasobra su yiu Arubiano ta dun’e derecho pa ta aki.
Marta Montaño ta un otro ciudadano cu tabata na DIMAS y a menciona cu tin cu yama danki na Minister Andin Bikker pa tur esunnan cu tin por lo menos 25 aña y mas, por trece nan famia. Pero tin leynan cu ta aplicabel pa esaki y tin hende cu no ta tene cuenta cu esaki. Tambe esunnan cu ta firma pa traha na cas di famia, no por warda riba e permiso. Mester tin un modificacion of un hustificacion pa demostra DIMAS cu e persona aki ta invalido of tin un mucha special, of e persona tin mester di e persona di servicio pa por traha na cas. Asina si DIMAS ta acepta. Pero otro cos ta cu tin cu warda pa e permiso den exterior. Loke nan lo bay firma pa prome biaha, cinco permiso tin cu pasa via labor. Inversionistanan mester tin den banco 250 mil florin, demostra esaki cu carta di banco.
Tambe Marta a bin cu un caso DIMAS, unda cu Warda nos Costa a detene un stranhero cu permiso cu ta vence na november. E hecho ey e ta haya un inhusticia. Tin hende cu tin tres of cuater permiso of mas, ta inhusto cu ta detene nan toch. Den e aspecto aki ta cometiendo hopi fout. Marta ta conta cu tin inversionistanan Venezolano cu tin miyones di florin aki, pero asina mes ya nenga nan permiso.
“En fin, e maneho di stranheria ta malisimo na Aruba”. Pa Marta, esunnan cu tin mas edad, mester wordo trata prome, pasobra nan tin hopi tempo bibando aki, ya nan tin nan firma liber y ta paga belasting. Nan mester bay cu personanan cu no ta paga belasting. Nan ta esunnan cu tin cu wordo saca afo. Pero esunnan cu ta contribui na economia di Aruba y ta cumpli cu tur rekisito na DIMAS, ta sinti cu e maneho di permiso na DIMAS, mester ta hopi mas miho.
