Chauffeur a bira malo: Accidente lamentabel riba Ser’i Teishi

Dialuna tempran a sosode un accidente riba Green Corridor, caminda un chauffeur a bira malo tras di stuur y bay dal den otro vehiculo pa despues bay pega den e vangrail band’i caminda.

Den careda di 7:15 am, momento cu gran mayoria di hende ta dirigi nan mes pa trabou, a tuma luga un accidente riba caminda grandi di Playa pa San Nicolas na altura di Ser’i Teishi. Un dama na stuur di un Hyundai Santa Fe a dal contra un van Nissan color blanco. E chauffeur di e van a tuma nota cu e dama a bira malo tras di stuur y a yama polis mesora.

Ambulance a presenta lihe na sitio pa atende cu e dama, cu segun por a compronde, a haya un ataca di epilepsia mientras e tabata maneha su auto. Ta un susto inmenso sigur pa ambos persona involucra y algo lamentabel pa esnan cu ta sufri di e condicion aki. 

Pa locual ta trata e vehiculo, e Santa Fe a bay pega riba e vangrail di tal forma cu e no por a core mas y a yama takelwagen pa kit’e for di sitio. E van a ricibi daño minimo y afortunadamente e situacion no a bira algo mas grave.