Diahuebs marduga, algo prome cu 2’or, polis di Playa den area di Sero Biento a duna un Toyota Yaris, number A-58816 un señal pa para riba e caminda di Sero Biento pa Santa Marta. E auto aki no a respeta ora cu polis a dun’e señal pa para. A cuminsa cu un persecucion. Chauffeur a paga luz y polis cu zwaailicht y sirena su tras, a sigui te ora cu net prome cu e rotonde di Mahuma, biniendo for di e caminda di Santa Marta, e auto a logra para.
Tabata tin cuater persona den e auto. Tras di stuur, un hende homber rasta y tabatin dos hende muhe tambe. Tur ta relativamente hoben. Loke a resalta ta cu polis tabata tin dos agente riba patruya. Ora cu a logra par’e, un pasahero a sali na careda core bay direccion Yucuri.
Ta sospecha cu e homber aki ta of tabata arma, mirando cu a mir’e wanta algo, pero no por describi cu tabata un arma of no. A cuminsa persecusion na pia su tras, pero debi na e caminda cu ta bay pa Yucuri, no a stop e persecusion, mirando ya caba el a cuminsa drenta mondi.
Ta un agente so tabata para cu e tres otro personanan den e Yaris colo blanco.
A pidi refuerso mesora y polis di Playa, polis di Santa Cruz y te hasta polis di San Nicolas y duna refuerso na e patruya. Na final a detene tur tres. Tanto e chauffeur como e otro dos pasaheronan.
Den e auto a haya grinder. Ta mustra cu no a topa cu nada ilegal. Mas bien ta e persecusion y ta pensa cu e di cuater persona cu a huy, posiblemente lo tabata arma, mirando cu tabata manera wanta algo.
A busca den e area, no a topa cu nada. Pa basta rato a keda busca den e area di Mahuma, Yucuri, wak si ta topa cu esun cu a huy. A transporta e tres sospechosonan pa warda di San Nicolas, caminda cu nan tin cu duna cuenta na Sub-fiscal. Tur ta bay haya multa mirando cu nan tabata riba caya durante Toque de Queda, y tambe e chauffeur tin cu duna cuenta mirando cu polis a dune señal pa baha y no a respeta esaki.
