Den oranan di madruga Polis tabata den un persecucion pa un auto sospechoso cu na final a resulta e chauffeur tabata basta bou influencia di alcohol.

Diaranson madruga ora cu e patruya di kustsurveillance tabata riba e caminda dilanti di airport nan a nota un Toyota Yaris blanco chikito cu number di carton bayendo direccion pariba y ta mira cu tin un persona lo ta purbando di bula for di e auto.

Mesora e patruya aki a pidi refuerso policial p’asina para e auto aki y check kico lo ta pasando cu nan. E vehiculo a sigui direccion pariba y na e rotonde di Sero Teishi, el a bira na man drechi y  e patruya a sigui su tras y te na e rancho pariba di waf di Barcadera e auto a bay para.

Aki ta unda tur e polisnan cu a yega na e sitio a baha bay riba esnan den e vehiculo sospechoso. Polis a atende cu nan y a haya un homber bao influencia tras di stuur y un muhe na banda. E chauffeur a ricibi un prohibicion pa core auto pa 6 ora. Despues di a hala nan atencion un patruya a hiba e muhe na Sabanilla Abao y un otro patruya a baha e chauffeur na Pos Chikito.

Comments

comments