E ultimo simannan aki Gobierno a logra yega na un acuerdo cu Teo Croes di Arubus y ayera cu Robert Henriquez di NV Elmar, den cual ambos Director ta tuma nan retiro “boluntario” a cambio di un pakete di algun shen mil florin den nan man. Aunke den ambos caso a firma un acuerdo di confidencialidad, fuentenan cerca di e negosacionnan ta sigura cu hunto nan a surpasa 1 miyon florin. E maneho aki ta contradictorio si analisa intencion di Gobierno pa reduci gasto di personal.
Na Arubus ya nan tin un Director nobo caba den mente, cu si tur cos ta bon, lo cuminsa traha dia 1 di december 2018. Pa por logra esey, mester a saca anuncio caba pa recluta interesadonan, locual no a sosode ainda. Ta mencionando nomber di un actual miembro di Hunta di Supervision como un candidato fuerte pa ocupa e funcion di Director di Arubus, bou unda ta resorta AruParking y AruTram.
Na NV Elmar ainda no tin nomber fiho menciona pa tuma e encargo, aunke tin un miembro den gerencia actual cu tin wowo riba e stoel di Director. Mientrastanto Shon No Maduro di 72 aña di edad actualmente ta sinta den e funcion di Presidente di Hunta di Supervision y alabes Director di e compania, ganando ambos salario. De facto e funcionnan ta conflictivo pasobra awor aki ta su mes ta controla su mes.
Dos Arubiano ta bira victima di persecucion politico sin mas na aña 2018. Den ambos caso a purba haya algo pa por kita e Directornan for di nan puesto pero ora no a logra a opta mesora pa paga nan “Golden Handshake” pa nan bay. Claro cu a libra nan mesora di tur posibel persecucion pf investigacion den futuro. Pues, den caso di NV Elmar, e investigacion haci pa un compania di accounting yega na e Gobierno aki, contra maneho di Rob Henriquez ta cancela. Henriquez tambe mester a cancela e caso sumario den Corte, cu mester a tuma luga e siman aki mes.
Fuentenan a sigura cu e punto principal di NV Elmar pa laga e Director bay, ta debi na presion sindical y persecucion personal di un  sindicalista. E forma di proceder di Gobierno, cu a haci mesun cos na Meteo y DVG, tin otro companianan di utilidad den susto. Nan ta premira ora di negocia cu sindicato, cu si nan bay for di mesa, e sindicato lo presiona Gobierno, cu na su turno ta kita e Director di trabou.

Comments

comments