Persecucion politico: Hues a destrui decision pa suspende Elio Blijden

Tabata na luna di juni di aña pasa cu Minister mr. Andin Bikker, encarga cu maneho di husticia y siguridad di nos pais, a dicidi pa prohibi entrada di Elio Blijden na Warda nos Costa. Siendo hefe di e departamento, a acus’e di lo a deporta un mucha muhe di 15 aña di edad. Pero e siman aki Hues a desbarata e ponencia di Gobierno y a destrui e decision di Minister Andin Bikker cu un ordo pa pone Blijden bek den su funcion!

ADV

Ta parce cu tabatin “hopi keho” contra funcionamento di e Hefe di Departamento, asina e mandatario a bisa den un encuentro cu prensa. Pero dilanti Hues e no por a convence e Magistrado di e kehonan aki y ni di e peso di e kehonan pa suspende e ambtenaar. Prome el a prohibi su entrada y despues a bay mas leu den su medida disciplinario, pa suspende Blijden di su funcion pa tempo indefini. E decision ey Blijden a reta den Corte di Ambtenaar y a gan’e den un sentencia di dialuna ultimo.

Abogado mr. Chris Lejuez a defende interes di Elio Blijden den Corte, durante tratamento di e caso. Den su defensa e abogado a logra convence Hues cu esaki ta un di e tantisimo casonan di “persecucion politico” y cu e Minister no tin ningun base pa tuma e decision ey. Ta for di e prome dia caba e abogado a duna di conoce cu Rode Kruis Aruba a manda un carta tendencioso pa Minister y e ultimo aki a hay “ciego” tras di e carta sin base di e cuero boluntario cu ta mete directamente cu maneho di stranheronan ilegal riba nos isla.

Abogado me. Chris Lejuez a defende Elio Blijden durante su Ambtenarenzaak contra Minister mr. Andin Bikker. Lejuez a gana e caso y Hues a destrui decision di Minister Bikker pa suspende Blijden.

Den su decision, Hues a destrui e decision di Minister Andin Bikker y a ordena Gobierno pa reinstala Blijden bek den su funcion. Un decision cu probablemente Minister Bikker no a conta riba dje, pasobra entretanto el a lanta un “Management Team” forma pa Trudy Hasell y Icho Matos, kendenan a tuma e trabou over di Elio Blijden na Warda nos Costa y di Gerald Vingal na Migracion Aruba.

Mientrastanto Gobierno mester dicidi si ta respeta decision di Hues of si lo apela e sentencia.

Comments

comments