Persecucion estilo Grand Theft Auto

Diadomingo marduga alrededor di 1:15 am, polis a duna un auto marca Toyota modelo Passo color blauw señal pa para na altura di Pricesmart pero sin resultado. E chauffeur a haya ta bon di purba trot bay laga polis.

Su intento no a dura largo. A sigui bay pabou y polis a logra par’e un poco mas pariba di Coral Pyramide. El a dal contra di un cura’i cas y un patruya di polis. A sac’e fo’i auto, mand’e suela y detene mesora. Ta sospecha cu e chauffeur ta indocumenta riba nos isla. A notifica polis di trafico pa documenta e accidente aki, mirando cu tin un patruya di polis envolvi.

E persecucion no a bay facil, a encera por lo menos tres pa cuater patruya di polis prome cu a logra par’e. E chauffeur tabata su so den auto. Den un transporte policial a hib’e pa ward’i polis caminda e proceso di interogacion y posibel deportacion lo continua, cu envolvimento di demas departamento, entre otro; Guarda Nos Costa. 

Persecucion estilo Grand Theft Auto

Posted by 24ora on Saturday, June 18, 2022