Un otro accion relampago di Guarda Costa cu polis a conduci na dos detencion riba lama. E biaha aki ta dos Venezolano cu a yega diadomingo anochi laat den awa teritorial di Aruba. Ambos riba un waverunner. E tabata un persecucion pisa caminda Metal Shark di Guarda Costa y tambe helicopter di polis tabata envolvi. Na final a logra gara nan.
Ambos a ser pasa riba e Metal Shark y djey a touw e waverunner bin cu ne tera. E Radar Kamer a capta e waverunner y p’esey a activa mesora. E ta mustra cu e dos Venezolanonan aki a bin busca drechi di e boto cu a keda confisca e marduga prome. E boto ta uno sin nomber y cu tres motor nobo Yamaha di 300 HP cada uno.
E boto ta uno prepara pa pasa bultonan di droga riba lama. Tur cos ta mustra cu e dos Venezolanonan a bin riba un waverunner pa purba bay cu e boto. Nan no a logra pasobra Guarda Costa a saca e boto mesun mainta for di awa. Baho mundo ta purba burla di autoridad di Aruba pero ta perdiendo e guerra cu e dos accionnan exitoso di Guarda Costa y polis.
