Diasabra madruga a drenta informe cu ta siguiendo un auto marca Toyota modelo Corolla color blauw cu number A57336 despues di cu esaki a caba di horta for di un auto staciona banda di Latin Passion. Na e momento ey e testigonan tabata na altura di Savaneta Kamp bayendo direccion pabao.
Patruyanan di San Nicolas a ser informa y a cuminza bay den e direccion ey. E auto a sigui bin pabao y a bira na e rotonde Pos Chikito bay nort. Patruyanan di Santa Cruz tambe a ser dirigi pa changa e auto di direccion contrario.
E auto tabata core cu un velocidad masha halto mes den tur e biradanan yegando Franse Pas e auto a perde control den e birada baha caminda y bay dal riba un palo di lus. E wayanan di coriente a keda lora rond di e auto. Den e auto tabata tin 3 persona, 2 homber y un muher.
Nan tur 3 a ser deteni, como cu nan lo por a herida nan mes den e impacto a yama pidi ambulans na warda di Santa Cruz pa atende nan. Na yegada di e ambulans nan a controla tur e victimanan y a bay cu e dama direccion hospital pa tratamento mas avanza.
Segun esnan cu a persigui e auto nan a bin haya e ladronnan den accion hortando rebolteando tur cos den e dashboard y a bisa e ladronnan “kico boso ta haci den mi auto” y aki e ladronnan a core sali subi e Toyota Corolla blauw A57336. Mesora e doño y cu amigonan nan a bay tras di e auto y a bin termina den un accidente. E ladronnan a bay cu varios cos entre nan un camara. Polis a confisca e vehiculo aki tambe.
