Coachnan Verda Betrian i Danaë Daal di e projekto ‘Ban Vèlt Bèk’ ker invita tur damita di edat 6 pa 12 anja na e klinika gratis di futbòl ku lo tuma luga na vèlt di Rooi Santu, ku ta situá dilanti Bakkerij de Zon. Esaki lo ta e penúltimo treinen di e projekto ku a start na yanüari 2019 i ta finalisa dia 21 di desèmber.
Djasabra 30 di novèmber for di 8:00 pa 9:30 or di mainta, manera ta kustumber, damitanan lo wordu introdusí ku futbòl i sinja e parti basiko di futbòl. E meta di e projekto ta pa laga e damitanan hasi deporte i tambe interesa nan pa djòin un tim di futbòl.
Ta invita mayornan pa registra pa e seshon na Rooi Santu, na number 5600709 i pa mas informashon por sigui e Facebook I Instagram Page ‘Curacao Women’s Football’.
