Pensionado rabia cu ta cobra BBO riba seguro di cas

6

Un ciudadano di edad bibando na Tarabana ta sumamente preocupa cu awo mester bay paga belasting riba seguro di su cas. Un gasto extra cu lo aumenta e peso riba e finanza familiar. Señora Sonia Westerburger a splica cu el a pasa mas di 40 aña den comercio di Aruba y nunca a hay’e cu algo asina. Awo cu e ta biba di pensioen so y supuestamente despues cu a bisa cu pensionadonan no ta bay paga nan, e ta bin confronta cu e gasto extra aki.

Malcontento den pueblo cu cobransa di BBO riba seguro di cas pa pensionado

Posted by 24ora on Thursday, July 25, 2019 

“E cos aki ta ponemi rabia masha hopi mes.  Mi ta haya e cos aki un sinberguensura di poco hende cu ta gasta placa na coy kens, manera biahamento, y hendenan cu a tuma na trabou. Nan a zundra Mike pa tur sorto di cos. Mi ta puntra cuanto mas. Si otro aña mi ta bida, kico extra mi mester paga atrobe,” e pensionado a bisa. Pa colmo e mester a paga esun di aña pasa tambe.

Lider di AVP tambe tabata presente, ya cu el a haya un yamada di sra. Westerburger pa e pasa cerca dje y papia cun’e riba e preocupacion existente. E lider a conta cu e conoce sra. Westerburger di hopi aña, un persona cu semper su bida a traha y a logra haya su mesun cas. Semper el a haci su contribucion pa e por haya su pensioen na grandi. Pero awor e ta sinti’e un poco desapunta, pasobra gastonan ta halto caba y awo el a haya un peso extra. Gastonan ta aumenta den tur skina. Awo ta bini algo cu nan no a spera, cu ta e BBO riba seguro tambe. Gobierno a duna 25 florin extra pa cubri e daño di BBO, un luna a bay na e seguro aki caba, sin conta e resto di prijsnan di tur cos a aumenta.

Eman a bisa cu nunca antes BBO a wordo cobra riba seguro of transaccion di huur di cas. Tur esaki mester paga awendia. Hasta riba gastonan di banco mester paga BBO, cu ta haci cu na cada schakel ta pagando un suma adicional cu na final ta bira hopi. “Esaki ta un realidad cu hunto nos mester bay cambia,” e lider di AVP a trece dilanti.

Ta hopi promesa a wordo haci den campaña pero cu no a cumpli cu nan. Y tur esaki ta bay ta aumentando e gastonan pa un pueblo cu no por wanta esaki mas.