Un grupo di por lo menos cuater persona a agredi un homber na altura di Santo Largo. Ambulance a presenta pa atende cu e persona cu a resulta herida mientras cu polis a cuminsa un busceda den area di Pos Chikito pa e agresornan.
Esaki a sosode den careda di 5:30 pm na momento cu a bati alarma pa un pelea formal na Santo Largo Savaneta, net patras di La Granja. Segun por a compronde cu un grupo di hende lo a yega y bati un persona malamente. Ta papia di un cap basta grandi na su cabes.
Ambulance a presenta na e sitio pa atende cu e victima mientras a cuminsa un busceda pa e agresornan, cu a bandona e sitio den un vehiculo direcion e area di Pos Chikito. Aki ta caminda cu e team special di aresto (RRT) como tambe K9 unit a bin topa cu e grupo y a detene un di nan. A informa di nan banda cu, nan tambe a resulta herida. A transporta e sospechoso pa warda di polis pa asina e duna cuenta di su actonan y motibo di e agresion.
