Ta parce cu historia di Antias y Aruba ta corda nos cu e Ministernan di Husticia a haya nan mes den basta problema dor di prizon. Tanto na Corsou y awo na Aruba por mira cu ora prizonnan no por wanta presonan mas aden, cu Minister di Husticia ta hay’e bou bastante presion politico, te na e limite cu si e ta baha of no. Andin Bikker na Aruba ainda no a yega su limite pa e tuma honor na su mes, pero na Corsou si Minister Pedro Atacho a dicidi cu e ta baha ora e no por a garantisa cu mas preso lo no huy di prizon. “Ta cada ken mester sinti pa nan mes ki ora a alcansa e nivel di norma y etica politico, pa tuma e decision ey”, asina el a bisa nos.
Pedro Atacho awe ta disfrutando di su pensioen pa algun aña caba. E tabata Minister di Husticia di Antias, e tabata Parlamentario y Presidente di Parlamento na Corsou. El a bira masha conoci ora cu na maart 1997 el a tuma su retiro como Minister di Husticia di Antias despues cu 3 asesino a huy di prizon y su tras 4 atracado di banco di nacionalidad Venezolano a scapa di prizon. Cu 7 preso peligroso riba caya, el a sinti cu e mester asumi su responsabilidad y baha como Minister.
E no tabata e prome Minister di Antias pa tuma retiro debi na problemanan den departamentonan di Gobierno. Prome cu esey caba un Minister di Salud Publico a tuma honor na su mes despues cu baby a fayece na Hospital. Claro no tabata su culpa, pero el a asumi su responsabilidad politico.
Aki na Aruba na mas di un ocasion, e mesun Andin Bikker, como Parlamentario, a yega di exigi pa ex Minister Arthur Dowers tuma su retiro. E tabata haci semper referencia na e situacion di Pedro Atacho na Corsou y otro Ministernan na Hulanda. Pero awor cu e ta den funcion y tin e record di tres preso asesino y peligroso ta huy di prizon y Warda di Polis, no ta aplica e pensamento cu e mes a vocifera den Parlamento.
Pedro Atacho a confirma na nos cu e tempo aya, esta na aña 1997, a bin hopi peticion den comunidad di gremionan y hasta Parlamento a pidi’e pa no retira. Na final el a dicidi pa “trek in” su retiro y a sigui den funcion. Pero, no a dura mucho. Un luna prome cu eleccion, na e mesun maart 1998, a haci un investigacion Parlamentario relaciona cu e situacion den e mesun prizon cu a sali masha malo mes. A cuestiona si Atacho a mete demasiado den e departamento y cu e lo por a stroba maneho di e prizon. E no tabata di acuerdo cu Parlamento, pasobra ni un dia a scuch’e y lag’e defende su mes. Cu e rapport ey den su contra, el a dicidi cu e ora si e ta retira, pues net un luna prome cu eleccion.
Pedro Atacho, siendo un politico retira di Corsou, conoce e situacion di cerca na Aruba. El a biaha hopi biaha pa nos isla pa reunionnan di Minister y como Parlamentario. Claro cu e no ta mete den politica local y no tin un opinion tampoco riba e situacion cu a presenta awo. E ta kere cu cada Minister mester considera pa su mes, ki ora ta e momento ideal pa tuma honor na Bo mes y retira. Ta keda na cada ken pa considera e limite di norma y etica politica. Den su caso, tres preso e huy hunto y despues 4 hunto, no ta algo normal y a considera cu aunke no ta su culpa, cu e ta manda un mensahe na tur hende cu e ta cuminsa na retira.
E diferencia entre Corsou y Aruba mas bien ta cu aki e actual Minister Andin Bikker pa hopi aña a papia di tuma retiro pa cosnan asina, pero awe cu e ta na mando y situacionnan pio ta sosode, e ta opta pa keda sinta riba e stoel di Minister mientras cu keto bay tin dos preso peligroso eyfo. Separa cu no a gara e fugitivonan ainda, tampoco ta tende di investigacion ni suspension ni den prizon ni na Warda di Polis. Esey ta indica cu ta un problema structural tin eyden den cual e infrastructura no ta duna mas y e demotivacion den e Cuerpo di Polis y Instituto Coreccional ta di tal indole cu no por garantisa siguridad mas!
