Ex minister drs. Paul Croes a scucha e demanda di Ministerio Publico, esta 5 aña di prizon, 5 aña for di politica y 5 aña cu e no por traha den ningun funcion mas den Gobierno.
El a indica cu si ta pa Ministerio Publico, e mester wordo cera pa semper, cu cadena perpetua. “Cera mi y tira e yabi afo”. No a sorprend’e cu Ministerio Publico lo a bin pa continua cu locual cu e ta considera un proceso inhusto, un proceso nunca bisto aki na Aruba y sigur no den henter Reino Hulandes.
Awe ta confirma su ponencia cu for di inicio di henter e asunto aki, un hende mester a colga y den e caso aki ta Paul Croes mester a colga.
Importante pa menciona ta cu no ta sorprend’e, despues cu Ministerio Publico a drenta 15 cas, 15 establecimento, na inicio di e investigacion aki, a inclui mas di 400 compania den e investigacion. A trapa riba su derechonan constitucional di defende su mes. A cer’e 80 dia den isolacion.
“Ta importante pa comunidad compronde cu mi no a mata, ni abusa di mucha, ni horta”. Paul Croes ta keda para riba su inocencia. E no a tuma placa pa ontheffing, no a wordo soborna, no ta forma parti di ningun organisacion criminal. No a laba placa y tur esaki diaranson awo, su defensa lo presenta esakinan. Lo mustra e tegenbewijsnan di esaki.
Ta importante pa comunidad sa, segun Paul Croes, cu e no a haci nada di esakinan. Ta conclusionnan eroneo cu Ministerio Publico a trece p’adilanti. Locual cu a trata na splica tambe ta, por medio di un stichting a haci varios di e peticionnan di donacion cu cualkier politico tabata haci den tempo di campaña.
Paul Croes ta sinti cu loke a pidi, ta basicamente e politico Paul Croes. E ta fastioso, e ta duro, pasobra e ta afecta naturalmente su famia, pero lo sali bon di esaki.
