“E inicio di e caso IBIS a start for di un email cu Edmond Croes di Solo di Pueblo pa PG y un FB page cu yama Pueblo No Kier Scucha Mas Di Gabinete Mike Eman”, asina ex Minister Paul Croes a declara na salida di Corte un rato pasa. “Un fake account cu bo no por haya sa su fuente y un mail cu Edmond Croes a manda pa Procureur General Alexander Van Dam. Den Corte a pone enfasis riba e hecho cu Ministerio Publico ta esun cu constantemente a mustra riba e importancia di substancia prueba. Un fake account sin un “verifieerbare bron” y ta start asina un investigacion grandi dor di esaki.

Con por ta posibel cu Ministerio Publico por a laga su mes wordo usa di e forma aki? Un FB page sin locual ta wordo yama un “verifieerbare bron” un fuente fidedigno. Con bo por acepta un denuncia di e forma aki, tabata pregunta di ex-Minister di Labor den su ultimo palabra awe den corte.

Banda di esaki e la cuestiona tambe un mail cu Edmond Croes manda pa Procureur General Alexander Van Dam, como cu ta trata di un contrincante asina grandi di dje. Ki objectividad tin den un denuncia asina? Tabata pregunta di Croes na Juez. Croes a cuestiona e proceder di Ministerio Publico den henter e caso IBIS. Paul Croes a yama esaki un ‘valse start’.

Banda di abogadonan di Croes a cuestiona tambe e hecho cu a drenta e cas di Croes dia 28 di Maart 2017 sin ningun prueba contundente. Un huiszoeking sin base legal alguno. Ta mustra asina mas straño e hecho cu testigonan cu a sigui no a duna declaracion (incriminante) contra Croes tampoco. E pregunta Grandi ta keda awor: Kico lo tabata motivacion e ora di OM pa toch sigui e caso?

Edmond Croes:

Diamars merdia, saliendo di Corte, Paul Croes a acusa mi persona, EDMOND CROES, cu lo ta esun cu a inicia e caso IBIS contra su persona, dor di entrega un aangifte contra dje na Ministerio Publico, na PG Van Dam.

Apesar cu esaki por ta un credito pa mi persona, mi no por tume sin mas, pa motibo cu e alegacion ta falso. Na ningun momento mi a acudi ni na polis, landsrecherche of na Ministerio Publico pa haci ningun aangifte.

Den e caso IBIS, den rekisitor di fiscal, por lesa hopi cla, cu ta dos empleado publico a acudi na OM pa haci aangifte. Den Paul su propio declaracion e mes a bisa awe cu un di e testigonan aki ta su propio empleado cu tabata traha cune. ( den su oficina!)

Pues, nos ta lamenta cu Paul Croes por a trece un acusacion asina dilanti, kisas pa propaganda, of unda kisas e lo ta pensa cu ami tin algo di haber, sinemabrgo AWE, nos ta aclaria cu nos no a haci aangifte ni tabata meti den e caso.

Ta net lo contrario! Ta ex-Minister Paul Croes a cuminza un caso contra mi na 2015. Lo demas ta publico y tur hende sa cu via di un abogado di HBN law mi a wordo demanda den corte pa alegacionnan haci den corant, unda mas bien nos a manda advertencia, cual na final Hues a dicta cu nos no mester cumpli cu texto di rectificacion cu a wordo demanda.

Loke Paul no kier a menciona awe ta cu na December 2014 otro persona a haci kisas e prome aangifte, pero 9 Augustus 2015, Ministerio Publico a rechasa e denuncia, bisando cu nan lo no actua riba e aangifte ey encontra Paul. Bo no a lubida, toch?

Mi ta asumi mi responsablidad pa mi trabao, di ta critico y vigilante. Abo asumi esun dibo. Hasi un aangifte, lo no ta nada robes, pero den e caso spesifico aki, mi no por carga credito pa loke mi no a haci. Sinceramente mi ta kere cu e credito mester bay pa Nicole Hoevertsz, Arthur Dowers, Benny Sevinger y Mike Eman, dos empleado, di cual uno ta bo propio trahador y tambe na Jan de Ruijter. Na Mike Eman y Benny y Arthur, mirando tur e signalnan, ta imposibel cu nan no tabata sa kico ta pasando, pami no tin nodo di bisa cu nan a colabora den tur sentido hasta cu e investigacion. Na Nicole Hoeverts, si encaso cu Paul no sa ainda, anto e busca pa sa. Lo demas Paul ta na altura.

Laga esaki ta bon cla pabo y bo famia y lo demas.

Comments

comments