Pa prome biaha den historia di Weganan Suramericano Hubenil ta inclui e disciplina di
Tennis y Aruba lo ta representa pa dos excelente exponente di e deporte, esta e rumannan Patrick y Frederick Sydow.
Weganan ODESUR ta bay tuma luga na Santiago, Chile na fin di september/comienso di october proximo. Ambos atleta ta preparando duro pa e reto importante nan dilanti. “Mi ta hopi contento y emociona pasobra mi sa cu ta un evento hopi prestigioso unda e mihonan di Suramerica ta bay y ami por representa mi pais. Mi a representa Aruba caba na hopi ocasion, pero hamas den weganan asina grandi manera esaki,” asina Patrick a comenta. E ta kere cu e preparacion fisico y mental lo ta obviamente duru, pero ta trahando caba hopi dedica cu nan entrenador Claudio Martinez. Frederik ta comparti e pensamento y sentimento di su ruman. E ta consciente di e oportunidad cu e clasificacion aki ta representa. “Na paisnan grandi cu tin un cantidad di hungado cu ta hopi bon, poco biaha bo tin e oportunidad di representa bo pais. Mi ta hopi afortuna di representa mi pais y en special hunto cu mi ruman, loke ta haci’e miho ainda.”
E ta confesa cu e no por warda e dia yega pa e duna tur di su mes. Pa cuminsa custumba cu e clima y cu e superficie riba cual ta bay hunga, e rumannan Sydow a biaha pa Argentina caminda temperatura ta parecido na Chile y ta practicando tur dia riba cancha di klei cu lo ta e cancha cu nan lo hunga riba den durante e Weganan Suramericano Hubenil. Frederik, kende ta programa pa gradua e aña aki, tin e peso adicional di su estudio pa balansa. E ta recorda su mes tur dia di su bendicionnan y di e oportunidad extraordinario cu e tin. Ademas di tennis, atletanan di Aruba participando den e disciplinanan di landamento, judo, taekwond, triatlon y tennis di mesa.
E rumannan tenista ta yiunan di e empresario local Franz Sydow y su casa Pilar, kendenan pa mas di 20 aña caba a haci nos isla di Aruba nan hogar y pais. Patrick y Frederick ta forma parti di e delegacion nacional hunto cu nuebe otro atleta cu ta bay cu e meta di surpasa e cantidad di 5 medaya obteni na nomber di Aruba den e prome edicion di e ‘Juegos Suramericanos de la Juventud’ cuater aña pasa. Comite Olimpico Arubano ta un di 14 comite participando den e competencia.
