Patrick Melchior (A.T.A.): Lo pone bari di sushi mas grandi rond di nos isla

Turismo ta nos fuente principal di entrada y ta p’e motibo ey mes tin cu cuid’e. Recientemente por a tuma nota cu lo realisa diferente proyecto pa mehora e experiencia di e turista na momento cu e bishita Aruba. Un di nan ta cu lo drecha cierto edificio cu a sufri daño a causa di vandalismo.

Patrick Melchior, Destination Services Manager di Aruba Tourism Authority, a splica cu tin varios proyecto andando, un di nan ta cu Metabollic Foundation cu lo ta encarga pa pone bari di sushi mas grandi na diferente localidad. Esaki ta un proyecto piloto cu A.T.A. a start desde aña pasa, sinembargo e aña ‘ki lo mira mas di dje. Pues por mira mas bari di sushi den diferente area, asina ta evita cu e cantidad di sushedad ta bira grandi. “Lamentablemente, esey tin cu bay man den man cu conscientisacion di nos pueblo y di tur cu ta bishita nos”, asina e Destination Services Manager di Aruba Tourism Authority a enfatisa.

El a continua bisando cu ta importante pa tur hende ta consciente cu tur hende mester respeta nos naturalesa y sa cu nos mester mantene nos alrededor limpi. Pa nos mantene tur cos limpi mester por tin un manera pa deshaci di sushi. Melchior a garantisa cu esaki ta algun cu lo traha hopi duro riba dje conhuntamente cu TPEF y tur socio den comercio.

Vandalismo t’un problema!

Lamentablemente tur caminda lo tin vandalismo di parti di e hendenan cu no tin nada otro di haci cu kibra cos di otro hende. Segun Melchior, unico manera cu lo por mitiga esaki ta pa conscientisa tur hende cu esaki lo ta un daño na e producto Aruba. Ta importante pa nan sa cu si daña e producto Aruba, e bishitantenan lo keda cu un mal bista cu lo transforma den un golpi pa economia y cada ciudadano tambe.