Pastor Daniel Szpila: Temporada di fin di aña ta uno pa hala reda

E temporada aki di fin di aña, tambe ta un temporada di hala reda, manera e piscadornan, hala reda canto di lama. Un etapa cu ta haci nos hala e reda cant’i lama y sortia e piscanan cu nos a coy aden.

Segun pastor Daniel Szpila, ta hopi importante esaki pa nos no lastra e reda yen di colebra pa e aña nobo, sino pa sortia e piscanan, pa nos pone esnan bon den macutu y esnan malo tira afo. Pues asina aki nos tin cu samina nos tempo, e tempo cu ta concluyendo, e periodo aki di historia chikito di nos bida personal, den bida di pareha, den famia, pa elimina y supera, reconostrui of cura locual a keda destrui, herida, locual no tabata bon, locual tabata eror. Ta hende nos ta y nos ta comete eror por supuesto. Tambe Señor a duna nos e sinti y boluntad pa nos reconoce erornan y tuma decisionnan mas corecto y mas prudente. Esaki ta hopi importante pa fin di aña pa sortia, pa samina kico tabata loke ta robes.

Por supuesto kico tabata bon,mas tanto cosnan exitoso como nos derotanan, nos faltanan, cu nos mester ta conciente di nan tur.

Locual cu tabata bon, locual tabata exitoso, pa fortalece esaki pa gradici Dios y otronan, pasobra si no ta pa Gracia di Dios y si no ta e apoyo di otro personanan, nos lo no a logra nada eigenlijk.

Tambe pa reconoce nos faltanan, pa pidi pordon na Señor Dios, cu nos a bira lomba p’e, buscando talbes nos capricho den nos ciegedad, nos pasionnan baho, nos a sa di distancia for di dje, causando hopi sufrimento na nos mes y causando sufrimento na otronan.

Tambe nos tin cu pidi pordon na otronan. Tambe mester ta un tempo di reconciliacion cu Señor, reconciliacion cu otro, reconciliacion cu mi mes, pa nos por canta sinceramente e anochi di Paz, ora nos lo celebra dia 25 di December nacemento di Señor, pa nos por sinti cu a yega e anochi di paz, cu a yega e dia di paz, cu un aña nobo limpi y puro ta naciendo pa cada un di nos, pa nos cas, pa nos famia, pa nos bida den pareha.

Pero pa e por nace nobo, limpi y puro, mester tin reconciliacion. Mester pidi pordon, mester duna otro pordon, no warda rencor.

Mester tin e capacidad aki di brasa otro, di bolbe duna otro un oportunidad, un chens un biaha mas y esaki lo yuda nos sigur sigur pa inaugura un tempo nobo realmente, segun Pastoor Szpila.