Pornografia no ta cos di awe, e ta exponi for di 79 aña despues di morto di Cristo, den e Imperio Romano cu tabata na mando.
Pornografia ta pica, e ta instrumento diabolico di scuridad, e ta hiba na seduccion, bagamunderia, inmoralidad, y hasta violacion.
Ora un hende ta drenta den pornografia, e persona ey si e ta casa e ta den adulterio, y si e ta soltero e ta fornicando.
Pasobra locual bo wowo wak y bo curpa ta desea, ta hiba bo na pica. Pasobra Dios no ta tenta ningun hende, ta hende ta tenta door di nan propio deseo cu ta hiba na pica, y despues pica ta hiba na morto.
Tin hende ta adicto na pornografia, hende nan cu nunca bo por a pensa, ta pega den scuridad, sin ningun speransa di salida.
Asina pornografia drenta den un matrimonio, adulterio, y inmoralidad a drenta, pasobra ta e pareha mes a trece, y hunto cu ne ta bini rebeldia, pasobra adulterio ta un pakete completo, si bo wak bon hopi mucha cu tin actitud rebelde y cu no kier respeta, ta bini di locual nan mayornan ta practica den cas.
Y, ora bo trece pornografia den cas via buki, video. Of e famoso telefon, bo a habri porta pa e enemigo drenta y cuminsa posiciona su mes pa kibra e hogar.
Via di telefon pornografia ta drenta, hopi biaha bo ta mira un hende ocupa den su telefon, hasta durante ora di trabao, of durante break, bo ta puntra bo mes cu ken e por ta papia, pero e persona no ta papia cu ningun hende ta riba e website di pornografia e ta.
Pornografia ta un negoshi diabolico grandi cu ta inclui tur tipo di relacion sexual, hasta di hende cu animal, y e cos cu mas disgusto ta trece den bida di hende cu sano huicio ta pornografia infantil.
Pa medio di telefon hopi proposicion indecente ta presenta hasta cu potret, y esey tambe ta cay bao di pornografia.
Por ta un pareha ta pensa cu entre nan dos no tin peliger si nan ta wak pornografia, por fabor no gaña bo mes , bo ta bezig den pica di adulterio y cu un momento of otro bo ta cosecha locual bo mes a sembra.
Boso a tende cu a wordo bisa no comete Adulterio, ma ami ta bisa boso, cu ken cu wak un muhe pa dese’e ya caba e a comete adulterio cu ne den su curason (Mateo 5:27-28).
Huy for di inmoralidad. Tur otro pica cu un hende comete, ta pafo di e curpa,ma e hende inmoral ta peca contra su mes curpa (1 Corintionan 6:18).
Warda bo curason riba tur cos, pasobra e ta e fuente di bida (Proverbionan 4:23).
Esun cu comete adulterio cu un muhe ta falta comprondemento, esun cu haci esaki ta caba cu su mes. Herida y deshonor e lo haya,y su reproche lo no wordo kita nunca.(Proverbionan 6:32-33).
Si nos confesa nos pica, E ta fiel y husto di pordona y libra nos di tur inhusticia (1 Juan 1:9).
No stima e mundo, ni e cosnan cu tin den mundo. Si un hende ta stima mundo e amor di e Tata no ta den dje. Pasobra tur loke cu tin den mundo, e deseo di carni,y e deseo di wowo, y e orguyo di bida, no ta bini di e Tata, sino di e mundo.
Pornografia ta un cos completamente di mundo, cu ta trece perversidad y inmoralidad, no ta cos di participa den dje.
Señor nos ta pidi bo pa manda liberacion awor.
