Pastoor Marcel Balootje: Fortaleza pa famia

GLORIA NA DIOS, Awo cu nos tur ta na altura kico a sosode y kico ta spera nos, nos por bisa manera Esteban a bisa den Echonan di Apostel Capitulo 7 versiculo 59 “ Señor no tuma e pica aki di nan na cuenta. Pasobra modernisacion a pone hende lubida Dios, y e palabra ta bisa cu mi pueblo ta muri pa falta di conocemento (Oseas 4 vers 5) pero tambe e ta menciona kico lo pasa ora bo rechasa conocemento, y tambe kico lo pasa ora bo lubida e ley di bo Dios.

Pero pa awo nos ta bay pone tur locual a pasa un banda y nos ta bay sigui traha riba e Famia, pasobra Dios ta un Dios di famia, y como mayor ta abo ta dicidi kico bo ta permiti den bo cas, sea bo ta modernisa perde bo paz, of bo tin temor di Dios , cu ta trece sabiduria y Felicidad.

Laga husgamento pa Dios, pasobra Señor Hesus a bisa den su palabra den Mateo capitulo 13 vers 30 : Laga tur dos crece hunto te na cosecha: Y na tempo di cosecha lo mi bis’e e agricultornan: Recoge e yerba shimaron prome y mara nan na boshi pa kima nan, ma recoge trigo warda den mi mangashina.

Pero tambe Señor Hesus ta duna un splicacion hopi cla den (Mateo Capitulo 13 vers 36 te cu 43) kico ta shimaron y kico ta trigo, peso e mes ta bisa , laga e yerba shimaron y tur esunnan cu ta Piedra di trompica y esunnan cu ta haci inikidad y Señor Hesus lo mes deal cu nan .

Tambe tin den beibel henter un buki di Revelacion/ Apocalipsis pa tur hende ta na altura kico lo pasa cu esunnan cu desobedece Dios su palabra y nan no arepenti,kico ta spera nan.

Como mayor nos kier bisa bo , pa bo prepara bo cas, yena bo hogar cu oracion, cuida bo yiunan manera un galiña ta cuida su puyito, pasobra nos no ta bibando den e miho tempo nos ta biba den tempo trabahoso, wak rond di nos kico ta sosode tur dia, cosnan malo, abuso di mucha en general ta aumentando, no ta importa ken a hacie, abuso ta keda abuso, y ta p’esey como mayor bo tin di vigila.

Beibel mes ta splica nos pa nos ta alerta, pasobra e diabel a bini pa horta , mata y destrui, p’esey nos ta zona e alarma pa abo como mayor cuida bo cas y no permiti pa e enemigo drenta, cu adulterio y violencia domestico. Oracion ta e base di tur cos , e ta nos comunicacion cu Dios, nos mester haci oracion, un cas sin oracion ta un cas bashi, un bida sin oracion ta un bida bashi, un Famia sin oracion ta un famia sin direccion, asina serio oracion ta pa nos bida.

Hopi biaha ora bo ta bay haci oracion bo ta sinti soño, lanta ariba bay laba bo cara of bebe awa friu of koffie cayente, pero no keda sin haci oracion, mas oracion bo deposita den e banco na cielo, mas forsa bo tin pa resisti e enemigo aki na tera.

Si no tabata asina Señor Hesus lo no tabatin tanto contacto cu su Tata den Cielo pa medio di oracion, y nota bon cada biaha cu Señor Hesus bay den oracion, mas forsa e tin pa cana riba lama, y mas poder e tin pa calma biento, y mas poder e tin pa reprende satanas.

P’esey nos ta bisa abo como mayor cu bo por ta schaars na placa den bo saco, pero no laga oracion ta scars den bo bida, pasobra awendia tur cos ta placa, pero den momentonan dificil, placa no por reemplasa Dios.

Concentra riba bo Famia, wak bon con abo y bo famia por sirbi Dios miho, bisa manera Josue ami y mi cas ta sirbi Señor. Ohala tur mayor por a bisa asina cu un curazon sincero, sabiendo cu Dios ta nos refugio y Fortaleza. Un yamada ta bay na e Pueblo di Aruba completo y tur caminda cu e mensahe aki por yega, pa laga nos busca HESUS CRISTO di henter nos curazon pasobra den dje so tin salbacion.