Pashentnan di Covid-19 a cuminsa yega Hospital

Desde siman pasa Specialistanan na Dr. Horacio E. Oduber Hospital a cuminsa alerta nursenan cu pa e fin di siman aki y e siman nos dilanti, pa ta prepara, pa posibel casonan di Covid-19. Cu mas di 800 caso activo, estadistica ta mustra cu awo e pashentnan ta cuminsa bira malo y yega Hospital pa tratamento avansa. Ayera y awe henter dia a nota Ambulancenan y Rapd Responder di IMSan cu sirena tras di otro riba bu, transportando pashentnan contagia pa Hospital.

For di Alarm Centrale nos a compronde cu ultimo dianan aki e cantidad di yamadanan solicitando pa ambulance pa pashentnan di Covid a crece barbaramente. Na Spoedeisende Hulp tambe a nota cantidad di pashentnan yegando cu hiperventilacion. No necesariamente e pashentnan ey ta malo ni ta keda interna.

E reto mas grandi ta, cu debi cu pashentnan mester ta isola, cu hopi pashent ta nan so na cas y tin miedo. E noticianan negativo rond di cantidad di casonan subiendo ta haci nan nervioso y nan mes cu nan mes ta cuminsa ansha y ta hiperventila. Dor di nan angustia ta yama ambulance bisando cu nan no por hala rosea. Asina yega Hospital ta pone nan relaha un rato y ta ripara cu nan por bay nan cas bek.

Asina mes a nota ultimo dianan a interna como 11 pashent den Hospital di cual 2 ta den e unidad di cuido intensivo. Di e dos pashentnan den ICU, un tin 39 y e otro tin 42 aña di edad. Un di nan ta basta malo y mester ta na mashin, pues no por hala rosea normal mas. Den casonan normal, asina un pashent subi mashin, ta dura mas o menos tres siman prome cu su pulmon por tuma e tarea bek.

Mester corda tur hende cu ICU no ta solamente pa pashentnan di Covid. Tin mas pashent interna eyden cu otro complicacionnan y retonan di salud. Di e 12 camanan disponibel awe, 2 ta den uzo pa Covid. Tin mas unidad cu por uza, si bira necesario. Hospital a manda busca extra nurse specialisa den ICU pa reenforsa nan ekipo existente. Tur esaki den preparacion pa si bin un ola di pashent den e siguiente 10 dianan.

Un specialista a conseha, pa specialmente pashentnan cu Covid-19, pa drumi por lo menos un ora pa dia barica abou. Tin hopi hende ta drumi pecho na laira, cu por ta motibo pa haya retonan cu pulmon. Drumimento cabes abou of cu barica abou ta evita cu pulmonnan ta desaroya problema cu por desemboca den pulmonia, net na momento cu tin Covid-19 cu mas bien por empeora e situacion mas ainda.