Pashent di Coronavirus a kibra silencio: Sistema di control no ta sirbi!

33558

Pashent number 7 di Coronavirus a dicidi di bay publico ora cu el a bira desespera mirando cu e forma pa atende cu e problema no ta funcionando. Ta trata aki di Diasil Rodriguez-D’Aguiar, kende a expresa cu e no ta mira pakico mester sconde si un persona test positivo. Mester kibra e silencio pa proteha famia y otro hendenan. 
Despues di sinti cu ta mand’e di cashi pa muraya, Diasil y a dicidi di pone su pesadiya riba Facebook y asina 24ora.com a yega den contacto cun’e pa conta su storia mirando cu Aruba y mundo ta den gara di Coronavirus. Mas ainda pasobra tin un comunidad yen di pregunta y cu kier mas informacion concreto pa por proteha nan mes. Esaki ta e motibo cu Diasil Rodriguez-D’Aguiar a dicidi di bin afo. E kier proteha su yiunan y su famia. 
Un biahe pa New York pa mira un concierto no a duna resultado pasobra a cancela e concierto. Na su yegada diamars siman pasa, el a haya e papel pa yena y a bis’e ki precaucionnan e mester tuma. “Nuna mi a kere cu mi lo ta un di e personanan cu lo bay haci e test. Nan a bisa mi cu nan lo bay yama mi”. Pero diaranson mainta caba el a lanta cu garganta ta kishiki y su casa a conseh’e miho e bay hospital, pero el a dicidi di yama e number y a bis’e pa haci e test diahuebs. 
“Corda cu bo tin cu keda den cuarentena,” nan a bis’e. Diabierna el a yama y bisa cu su casa a bay traha, pasobra e no a biaha cun’e y cu e momento ey su so ta den cuarentena. Nan a conseh’e bisti su “mondkapje” desinfecta e cas y no yega mucho cerca di e muchanan.

Exclusivo: Scondemento di Prome Minister no ta yudando: Pashent #7 di Coronavirus ta kibra silencio

Exclusivo: Scondemento di Prome Minister no ta yudando: Pashent #7 di Coronavirus ta kibra silencio

Posted by 24ora on Monday, March 23, 2020

Diasabra el a lanta y sinti cu e tos a bira un poco mas pisa pa cual el a dicidi di yama e number, pero nan a bis’e cu nan a lubida, pero cu por bisa cu tur e testnan haci a sali negativo. “Pero nos lo yama bek.” A duna nan dos ora pa scucha e resultado pero nada y 4’or tampoco. Te banda di 6:30pm a haya un yamada unda a dun’e e noticia cu e test a sali positivo y e ta pashent number 7. Mesora el a puntra cual ta e siguiente stapnan. “Un hende lo pasa cerca bo mañan a conteste. Diadomingo a yama y whattsapp y nada, y a informa nan di biaha cu esun di 1 aña a lanta cu keintura y tin un tosamento. A bisa pa hiba e menor pa test. 
Dialuna den oranan di marduga, a tende e casa ta cana den cas y ta mand’e un whattsapp y asina el a bin haya sa cu su yiu di dos aña tin keintura. A dun’e zetpil pero e keintura no ta baha. Mesora a dicidi di yama e number, pero no a haya contesta pa cual a dicidi di tuma contacto cu 1ste hulp, kende a conseha pa bañe cu awa friu of warda pa contact dokter di cas. Y esey nana haci despues di 8’or di mainta. Di e forma aki a logra haya cu 4 persona a yam’e tras di otro, buscando e mesun informacion y asina e mucha di 2 aña a bay test. Nan ta sperando e resultadonan. Pero e ta preocupa pasobra e tin su casa y yiu di 8 aña cu ainda no a bira malo y no a test ainda.
Loke e ta lamenta den henter e proceso aki ta cu enbes cu nan yuda e hendenan, ta cuestiona nan. Asina por ehempel e ta puntra con un hende por bay den cuarentena den su mesun cas, unda su famia tambe ta kedando. E ta haya cu e hendenan mester bay di biaha den isolacion, leu di famia. Ademas, ni 50% di e casnan na Aruba no tin dos baño. Pues tur hende ta uza e mesun baño. “Mi ta hacie limpi ki ora mi uza e baño, pero e por keda tres ora den aire. Ta puntonan cu nos falta concretisa pa tin un sistema cu ta cana. Mi no ta bisa cu DVG ta haci un mal trabou, pasobra nan tin poco hende pa tur e trabou. Nan no por “follow-up”. Awo mi tin dos yiu chikito cu a bay haci e test, pero mi tin mi casa y mi yiu homber cu no a test ainda.”

Dialuna, despues di su publicacion, finalmente un hende a bini pa controla e muchanan. “Mi a bisa nan cu mi no a bay Facebook pa bira famoso. Mi a hacie pa conscientisa e hendenan cu esaki ta algo serio, alarmante y mester cuida nan mes. No tin remedi pa yuda, ta abo cu bo curpa mester combati esaki.”

El a splica cu el a combersa cu dos bon amiga, prome cu el a dicidi di sali afo y bisa cu el a test positivo. Pa esnan cu ta husga, e ta bisa “ken lo por a pensa cu mi lo bay trece e virus. Tin un famia di ocho cu tambe a bay y a haci e mesun test cu mi. Nan a sali negativo na New York  . Ami a bin na Aruba y el a sali positivo.”

E ta haya cu si un persona tabata positivo, e por djis sali afo y conscientisa e pueblo. Kisas no ta corda ken tur e topa of papia cu nan, pero por ta e otro persona si ta corda. “Pone e parti di husgamento un banda y pensa riba e pueblo.”
Den su ultimo mensahe, el a bisa cu e ta spera cu tur hende tuma e asunto na serio, cuida bo famia, y no bay riba caya. “No ta facil pa ta den isolacion, pero mester haci’e pa bo famia y pa Aruba”.