Durante contesta di Secretario di Estado, Raymond Knops, durante tratamento di presupuesto di su Ministerio diahuebs ultimo den Parlamento Hulandes, por a nota iritacion y frustracion pa cu falta di cumplimento y desconfiansa den Gobierno di Aruba. Esaki tambe a wordo expresa door di varios miembro di Tweede Kamer. Den un carta fecha dia 7 di october ultimo, Secretario di Estado Knops a informa Gobierno di Aruba cu e lo trece dilanti un concept-KB pa duna Aruba un aanwijzing den reunion di Conseho di Minister di Reino di diabierna dia 18 di october proximo.
Segun e Secretario di Estado, Gabinete Wever-Croes no ta cumpliendo cu e protocol firma na november di 2018. Ya ta casi un aña pasa cu a haci palabracionnan pa cu e cambio di ley di supervision financiero pa extende e supervision y e normanan pa e añanan 2019 te cu 2021. E hecho cu Gobierno di Aruba no a manda e ley riba cual Parlamento a entrega un amienda pa Gobernador di Aruba pa wordo ratifica, no ta suficiente, segun e carta ariba menciona. Ainda Gobierno di Aruba no a cumpli cu e palabracionnan pa ancra e normanan den un cuadro legal hunto cu e “begrotingsregels”. Pa esaki Secretario di Estado Knops ta urgi Gobierno di Aruba pa haci esaki boluntariamente y mas lihe cu ta posibel.
Loading…
Reload document 
Open in new tab Concept Aanwijzing ta cla pa Aruba
Pa loke ta trata e reunion di Conseho di Minister di Reino di diabierna venidero, Secretario di Estado Knops a confirma loke tur hende tabata sa. E mandatario Hulandes tin como meta pa trata e concept-KB durante dicho reunion. E aanwijzing pa Gobierno di Aruba lo inclui, manera CAft a conseha recientemente: Incorporacion y transparencia di inmediato di e Sociaal Crisisplan den presupuesto; ehecucion di inmediato di e plan di reduccion di personal manera acorda; como tambe e reforma fiscal pa introduci mas medida pa aumenta e entradanan di Gobierno.
Gobierno mester manda empleadonan publico cas
E plan di personal tabata consisti di un reduccion di gastonan di personal di 12 miyon florin pa aña pa cual retironan obligatorio lo ta inevitabel. Tambe Gobierno a presenta un reforma fiscal cu te awor a resulta den un aumento severo di impuesto y si sigui cu e plan, esaki lo nifica mas medida ainda! E carta ta elabora riba e procedura cu Gobierno di Aruba por encamina na Raad van State den caso cu no ta di acuerdo cu esaki.
Proyectonan PPP nobo mester aprobacion di CAft prome
E carta di e Secretario di Estado ta indica tambe cu cualkier iniciativa of plan cu ta consisti di un proyecto PPP, manera e.o. construccion di un prizon nobo y e “incinerator” di Serlimar mester wordo aproba pa CAft prome. E aprobacion di CAFft pa gastonan di Gobierno, hunto cu e “begrotingsregels” ta puntonan cu e Gobierno actual a acorda cu Hulanda na november 2018.
Pa finalisa Secretario di Estado Knops ta pidi Prome Minister pa “stick to the facts” na momento di duna declaracionnan riba loke Aruba cu Hulanda ta palabra como tambe loke ta wordo treci pafo despues di reunionnan di Conseho di Minister di Reino. Ta remarcabel cu varios persona a wordo copia den e corespondencia, cu ta confirma cu un KB dentro di poco ta inevitabel.
