Pasando auto: A perde control bolter riba caminda di Hato

Un rato pasa, mas o menos 11:20pm a sosode un accidente riba e caminda di Hato, net patras di e kazerne di Cuerpo di Bombero na Tanki Flip. Un auto a bolter den greppel, pa cual Bomberonan a sali mesora pa brinda asistencia y libera e heridonan.

E prome unidad di Polis cu a yega na e sitio a topa cu un auto marca Toyota modelo Yaris color blanco numera A-22233. Den dje tabatin dos hende muhe, di cual un ta casa di un Polis.

Prome indicacion na e sitio ta mustra cu e auto a bay pasa dos otro auto riba e caminda di Hato, coriendo den direccion di e rotonde di Tanki Flip. Ora e Toyota a drenta bek den su banda, probablemente el a drenta di golpi of a haci’e mucho duro, cu consecuencia di perde control y bolter net bou di un palo di kwihi. A da den poco baranca grandi canto di caminda.

Tanto e chauffeur como e pasahero a resulta herida, pa cual dos ambulance a presenta na e sitio pa brinda asistencia. A transporta ambos victima pa Hospital pa un checkeo medico, mientras cu tanto Forensys y Nagico a keda na e sitio pa investiga con e accidente a sosode y regla pa hiba e auto pa nan cliente.