Mas di 1400 pasahero ta urgiendo Florida pa laga nan drenta, pero oficialnan ta bisando cu e estado simplemente no tin mas recurso pa tuma extra peso. Ora cu Andrea Anderson y su casa a subi e Crucero MS Zaandam na Buenos Aires, Argentina, mas cu 3 siman pasa, nan no tabata sa cu e trip aki lo ta desastroso. Esaki ta bin p’e pandemia global cu lo laga nan pega riba lama.
Sin por haya un waf dispuesto di laga nan drenta, den e ultimo 2 simannan e barco ta pasando desespera pais pa pais. Te cu awo e paisnan di Chile, Peru y Argentina a nenga nan entrada ya cu nan a cera nan waf p’e outbreak di coronavirus. Awo e ta bayendo direccion Merca, specialmente Fort Lauderdale, cu speransa.
“Nos no sa si nan ta bay acepta nos. M ta spera cu si,” Anderson di 63 aña, artista di fiber di Maineville, Ohio, a bisa. “Nos mester baha di e barco aki.” Anderson y mas di 1200 otro pasahero ta rogando cu Florida pa laga nan drenta, pero oficialnan, incluyendo Gobernador Ron DeSantis, a bisa cu e estado no tin e recursonan pa tin extra carga y e crisis di salud ta creciendo. “Nos no por permiti nos mes pa tin mas hende cu no ta di Florida baha na Zuid Florida, uzando e recursonan valioso,” Desantis a bisa Fox News.
Riba e barco 4 hende a fayece, al menos 2 di nan ta di e coronavirus, mientras otro 9 a test positivo y 179 tin e sintomanan di griep. Hendenan ta birando malo y mester e cuido corecto di hospital. No por trata nan riba barco. E pasaheronan riba e barco, ta mayor di un hende, welonan, tanta y omo. “E gobernador mester pensa, ‘Si esaki tabata mi mama riba e barco?,” asina Anderson a bisa. Mas di 300 Mericano ta riba e barco, incluyendo 49 residente di Florida, di cual hopi di nan ta biba den Broward County.
E pasaheronan ta estrictamente cera den nan camber y ta laga e cuminda pafo di nan porta. Aunke durante e 30 minuut cu ta permiti nan di cana rond di e barco, nan no mag mishi cu nada, sinta niun caminda ni para cerca di otro. E crucero, cu ta di Carnival Corp.’s Holland America Linie, a sali di Buenos Aires dia 7 di Maart pa recore Sur America durante 2 siman. E trip lo a stop na Chile dia 21 di Maart, prome cu tur pais a cera porta pa nan.
Orlando Ashford, presidente di Holland America, ta yama e multiple rechaso di wafnan un “cirsis humanitario” den un comunicado. “Nos ta tratando cu un sindroom di ‘no ta mi problema.’ E comunidad internacional a cera su mes pa Zaandam, lagand’e pa su cuenta,” el a bisa. “Esakinan ta almanan sin suerte cu ta atrapa den un cambio lihe di salud, policy y restriccionnan di frontera cu a pasa lihe mundialmente.”
Anderson ta spera cu Florida realisa cu e cantidad humano di hende nenga y eventualmente laga nan drenta. “Esakinan ta hendenan di berdad cu ta birando malo y cu ta leu di nan famia y di cuido adecua”, el a bisa. “Cuanto hende mester muri riba e barco prome cu nan realisa nos mester baha?”
