Desde cu a habri fronteranan di Aruba, mesora a bin cu e obligacion pa sea ta yega cu un test recien haci contra Coronavirus, of mester haci un na Aeropuerto. Dr. Horacio E. Oduber Hospital ta encarga cu e testnan aki, pero ta cobra $75 of €65 of Afl. 135 pa cada test. Esun cu haci test na Aruba mester keda 24 ora den cuarentena, sperando resultado di e test haci.
Aunke esaki ta bira un gasto adicional pa cada pasahero, e ta necesario pa mantene nos isla liber di e virus. Siendo un isla tuistico cu capacidad limita di camber di Hospital pa un pandemia asina, ta rekeri tur e sorto di controlnan asina pa evita cu nos ta importa e virus via turistanan cu despues ta contagia nos ciudadanonan.
Un experto riba e tereno a sigura cu e prijs cu ta cobra pa test na Aruba ta hopi rasonabel compara cu otro paisnan. Na Hulanda por ehempel KLM ta cobra €180 pa un test asina, prome cu subi avion pa un destinacion cu ta rekeri sorto di pruebanan asina. Na Merca tambe ta papia di tarifanan mas halto cu locual ta cobra aki.
Danki Dios cu Gobierno a garantisa cu Hospital mes ta haci e checkeonan aki y nan mes ta cobra tambe. Pasobra si bin 10% di turista mes e aña aki, lo ta 100 mil pasahero, pagando 75 dollar ta 7.5 miyon dollar! Esey lo bira un bon entrada pa Hospital, si saca afo cu pa algo mas di 1 miyon dollar ta cumpra e mashinnan sofistica pa haci e testnan. Es mas, Hospital a emplea ex nursenan, sea cu ta na cas of ta pensiona, pa den forma di parti-time nan haci e trabou na Aeropuerto. Esaki sin duda pa mantene nan gastonan mas abou posibel pa garantisa un bon entrada pa e fundacion, cu ta den problema financiero hopi serio y hasta alarmante!
