Desde cu a habri e frontera pocopoco e vuelonan ta yegando. Mas pasahero ta yegando riba KLM for di Hulanda. Sinembargo, e proceso ta largo, pasobra mester haci e test di Coronavirus na Hulanda caba, prome cu biaha. Esey por lo menos un pasahero a conta awe riba e prome vuelo comercial for di Hulanda.
E pasahero Lucienne Veldman a bisa cu nan mester a yena un ED Card prome, pa despues haci e test door cu e website tabatin problema. El a keda te den oranan laat cu hendenan di ATA pa por a yena esaki y evita haya un boet. E vuelo a sali cu un delay y e pasaheronan no tabatin distancia den avion.
Veldman a pasa lihe pasobra e no a bin cu un maleta grandi, aunke cu hopi hende a tarda 1 ora den fila prome cu nan por a check-in na Schiphol. E cumpramento di ticket a bay hopi lihe, pero e proceso di sa cua documentonan mester pa yega Aruba ta tarda. E studiantenan a pega cu esaki, pasobra nan no tabata bon informa cua ta e documentonan necesario y a dura dianan p’e por a haya informacion. Nan mester a paga adelanta pa por haci e test di Coronavirus, cu a costa no menos di 68 Euro.
E ta recomenda otro pasaheronan cu tin pensa di biaha pa Aruba pa tene cuenta y pa tin tur documento na ordo prome cu biaha. Tambe pa cuminsa prepara tur cos 1 siman adelanta, pa ta sigur cu por biaha. E trahadonan di ATA a bis’e cu si a yena e ED Card y no a logra pag’e, cu e lo por haya un boet pisa. Esaki ta algo di lamenta, e ta haya. Aunke cu el a haya problema cu e website, Veldman a keda tuma contacto cu ATA te ora a soluciona esaki. Di tur e biahanan cu el a bula, e diferencia ta controlamento di maleta y a haya un bar code pa por haci e test.
Marelyne Richardson ta un mayor cu a bay busca su yiu na aeropuerto. Tur cos a bay bon desde momento cu el a yena e formulario y pag’e. Tur esunnan cu a yega den e vuelo, mester bay den cuarentena pa 24 ora. P’e ta importante pa su yiunan regresa y simplemente ta djis planea bon. Awo ta poco mas facil compara cu e temporada anterior, pasobra e cuarentena no ta largo. Nan tin cu pasa door di e proceso y despues por haci tur cos cu normalmente sa haci caba.
