E señora Hulandes cu mester a sali awenochi riba vuelo di TUI pa Hulanda, via Corsou, a keda atras deteni. E lo mester responde na acusacionnan pisa cu tin awor den su contra. E proceso ey ta cuminsa cana awor hunto cu Recherchenan encabesa pa Fiscal di Ministerio Publico. Anuncia un bom den Aeropuerto subiendo un avion ta un acto criminal, pero cu awe dia hasta ta considera un acto terorista.
Altocomisario Andrew Hoo a bisa cu Ministerio Publico lo mester dicidi riba ki acusacion ta aplica contra e pasahero, speciamente si tene na cuenta e consecuencianan di su acto, esta cu vuelo di TUI no por a sali y cu mester a desvia un vuelo di American Airlines for di Miami pa baha na Corsou.
Un di e prome fasenan di e investigacion lo ta pa analisa e persona riba su mes. Ki dia el a bin Aruba, kico ta su patronchi di biahe nan, si el a yega di cay den man di husticia caba na Hulanda pa casonan similar, si e tin antecedente criminal, etc.
“Por lo pronto e señora aki lo bo bandona Aruba”, asina Altocomisario Andrew Hoo a sigura awe marduga durante un entrevista bibo para dilanti terminal di Aeropuerto.
