Partiendo mas permiso pa V-Wagen, Tour y O-vergunning

Aunke cu na varios ocasion a yega di papia di moratorio riba mas permiso pa V-Wagen, Tourbus y pa autonan luhoso O-vergunning cu ta competi cu Taxinan, toch Gobierno a opta pa sigui otorga mas permiso. Algun siman pasa un persona a manda Minister Chris Romero un carta y den tempo record a contesta positivo pa permiso di V-Wagen, Tourbus y O-Vergunning.

For di Departamento di Transporte Publico nos a compronde cu e maneho aki ta causa masha disgusto cerca Taxistanan y cerca e companianan cu ta huur auto. Ta sinti cu ma un forma delibera Gobierno ta haci e slice di e bolo cada biaha mas fini. Ya varios compania di huur auto a cera caba of a bende pa motibo cu e negoshi no ta manera antes mas.

Ta bin acerca cu Taxinan ta mirando un tendencia cu a stop di duna mas permiso di Taxi, pero si a cuminsa duna O-vergunning cu ta ofrece casi mesun servicio cu Taxinan.

Ta estima cu tin riba 5 mil auto di huur na Aruba caba y asina aki ta djis sigui duna mas permiso, haciendo e mercado mas chikito pa e companianan existente.

Remarcabel ta cu tempo di Minister Otmar Oduber tabatin moratorio riba practicamente tur e tipo di permisonan asina. Na momento cu Oduber a bandona gobernacion, Minister Mike de Meza a adapta e maneho y entrega mas permiso. Awor cu Minister Chris Romero a asumi poder, el a continua cu e mesun maneho di De Meza, pa cual den dos luna esunnan yega na Gobierno ta haya permiso pa V-wagen, Tour y O-vergunning pareu.

Ta mustra cu e tendencia awor ta cu tur esunnan cu tin compleho di condominium y huur di apartament, cu por solicita pa permiso pa V-wagen, Tour y O-vergunning pa asina por ofrece un servicio total na e huespednan. Si e maneho di Minister Romero ta basa riba tur cu tin algun apartament na huur, ta con lo haci ora hotelnan tambe pidi pa nan ofrece huurmento di un auto tambe den nan paketenan “all inclusive”?