Esaki ta e unico conclusion cu por saca di loke cu a keda publica riba e pagina di Facebook di partido RED.

Nan a menciona cu e cambionan cu Minister Lampe kier haci ta hayando hopi obheccion y e obhecionnan aki ta bini di personanan yena di ignorancia, segun e texto publica riba e pagina di Facebook. Pero tin hopi mas cu a wordo dirigi riba tur esnan cu ta contra e maneho di Minister Rudy Lampe.

Ta imposibel pa bisa cu Lampe no ta na altura di contenido di e publicacion ofensivo aki y no a ni duna ordo pa kita esaki, mirando cu e ta un publicacion ofensivo pa esnan trahando den sector di enseñansa.

E articulo ta cuminsa pa papia di e negativismo cu ta reina na Aruba den nan parecer. “Na Aruba palabra mayoria bes tin tinte politico negativo of ta wordo interpreta asina. Hende no ta busca pa mira e berdad presenta na nan. Paso nan tin otro enfoke, otro intencionnan.” Y despues ta bini un alabansa na e mandatario, cu e partido ta considera como un persona excepcional, cu un memoria asina desaroya cu no mester notula nada pa e corda loke a wordo bisa. Pero tambe un persona humilde y cu un don pa scucha.

E articulo ta splica cu niun hende tabata kier e cartera di Enseñansa pasobra e no ta crea voto durante campaña, pero pa su conocemento, ta e persona indica pa saca enseñansa di Aruba for di e abismo cu nan ta bisa e ta aden. “Un  tarea imposibel si bo ta encontra cu resistencia a base di ignorancia, a base di terkedad, a base di color politico. Sinembargo me-mei di tur e turbulencia causa pa daña su nomber, el a dirigi su maneho riba e mucha. Riba inclui delaster un mucha den e forma di duna enseñanza, adapta na necesidad di cada mucha. Y a haci tur su posibel pa traha fondo necesario.”

Despues di splica kico tur el a haci y tur e ‘desaster cu el a haya enseñansa den dje”, ta papia di e resistencia cu el a topa cun’e pa trece cambio.”El a topa cu resistencia, oposicion y sabotahe di su maneho siendo cu tur grupo a haya participacion. E Plan di Educacion Nacional (PEN) a keda aproba y presenta. A keda presenta tambe e plan di maneho riba tereno di Desaroyo Sostenibel ….”

Y pa pone e cherry riba e bolo di e atake riba esnan conrta su maneho (red: maestronan), e articulo ta finalisa bisando “anto un grupito di docente hunto cu SEPPA y SIMAR tur cu nan propio agenda politico no kier e mas como Minister di Enseñanza? Esey na Hulandes ta wordo yama hendenan cu un “tunnel visie”. Cu den e caso aki no ta ni esey. Ta trata aki di hendenan cu ta mina democracia. Hendenan cu ta pretende di sa miho unda Aruba tin cu bay cu su Enseñanza. Un grupito “educá” (?)”.

 

Comments

comments