Simposio RIAZ: Aruba ta solamente 180KM2 y no por carga mas hende

Partido Raiz a organisa un simposio na Cas di Cultura diabierna ultimo, caminda cu tabata tin varios orador for di tanto di exterior como local. Ursell Arends, lider politico di e partido, den e ultimo lunanan nan a bin ta promove e simposio. Entre e oradornan por a haya gerente general di Bucuti, Ewald Biemans y tambe ex director di AHATA, Jim Hepple. Tambe tabata tin oradornan cu a papia di reciclamento di plastic cu ta yega nos costanan via lama.

E enfoke di e simposio tabata pa yega na un vision cu por drive e discusion den comunidad, unda nos kier hiba nos isla.

 

Den e ultimo añanan, nos tur por scucha cu nos isla a pasa su capacidad di carga. Tin ta bisa “no hay cama p’a tanta gente,” “vol=vol”, etc.

Sin embargo, cu e informacion cu e oradornan a bin cun’e, e publico presente durante e simposio, por cuminsa formula nan propio opinion. Di esaki nan por contribui na unda kier hiba Aruba. Sigui desaroya camber di hotel, segun e oradornan, no ta e manera pa bay. Nos mester tene na cuenta tambe cu Aruba ta un isla di solamente 180 kilometer cuadra y nos no por sigui carga mas hende.

Tin cu tene cuenta cu e aspectonan social, scol pa nos hobennan y e calidad di bida cu nos mester brinda tur ciudadano cu ta bira aki riba. Esey ta loke cu Raiz kier enfoca riba dje. Esey ta e enfoke di e simposio. Pueblo por cuminsa crea nan propio opinion, pa asina nan contribui na un forma sano, unda nan kier hiba Aruba, den e proximo 10 pa 15 aña.

Tur pais cu ta sobresali na mundo, ta paisnan caminda cu e comunidad y tambe cu e lidernan a bin hunto, pa asina aki pensa a largo plazo, ki tipo di economia nan ta bay tin, cua ta e pilarnan economico cu nan kier crea. Na Aruba tin un solo pilar economico cu ta turismo. Pa hopi aña ta scucha tur e instancianan internacional ta bisa Aruba, cu a yega ora pa crea otro pilarnan economico. Pero pa crea otro pilarnan economico, mester tin ciudadanonan prepara pa bay traha den e industrianan cu nos kier crea tambe. Cu e informacion di e simposio por cuminsa pensa unda, ki industria nobo kier bay crea, ki tipo di trabao kier bay crea cu e industrianan nobo aki y ki tipo di calidad di estudio e ciudadano mester pa asina yena e cuponan di trabao cu ta wordo crea.

Cu e simposio lo por cuminsa empuha e discusion aki den comunidad. Hunto por bin na un entendimento of bin na un plan pa hiba Aruba dilanti den e proximo 10 pa 15 aña. Tin diferente caminda pa yega Roma. Pero si kier yega Roma, nos tur mester traha hunto pa por yega. Aunke tin diferente ruta, pero e meta ta pa yega. Esey ta loke kier, pa Aruba keda un isla sostenibel na unda no solamente e ciudadanonan, pero tambe e turistanan cu ta bin bishita, por disfruta di dje. Y mas cu tur cos, ta garantisa cu e ta keda un isla saludabel, unda nos yiunan y yiu di nos yiunan por biba felizmente, Arends a comenta.