Partido POR na e momentonan aki tambe ta na candela. Ex Minister Otmar Oduber, lider di partido POR, no sa mas con pa purba maneha Minister Marisol Tromp. E falta di poder awo a traduci den campañanan anti-Marisol y tur otro strategia coordina pa purba descredita e mandatario.
Otmar Oduber a bisa di a retira pa motibo di salud, pa dedica tempo na famia y pa no bira dinosauro politico. Awe diripente e ta consehero. E kier tin control riba e maneho di Marisol Tromp pero no ta logrando te cu awe. Pesey mes e desesperacion unda Andin Bikker y Otmar Oduber a cera cabes pa asina purba bula Marisol Tromp. E chens ta grandi cu lo busca tur manera pa convence Parlamento pa presenta un mocion di desconfiansa pa baha Marisol Tromp for di su funcion.
E accionnan di Minister Marisol Tromp pa rescata Serlimar tin Otmar Oduber den un desesperacion. Awe Otmar Oduber no por biba cu su soldatnan a wordo bula na Serlimar. Soldatnan cu a presta nan mes pa lag’e haci y deshaci como mandatario unda 12 miyon extra riba e presupuesto a wordo gasta y awe mas cu nunca Serlimar ta practicamente bancarota. Minister Marisol Tromp a para e contract lucrativo di Errol Henriquez cu ta sponsor di Otmar Oduber (TOB). Djey a kita tambe e director di Serlimar. A sigui cu bula cabes di Giovanni van Wijk cu tabata Presidente di e Directiva di Serlimar. Tambe a kita Jackeline Maduro cu ta ruman di Ralph Maduro. Jackeline Maduro ta traha na SVb pero tambe tabata secretaria pa Otmar. Trahando na SVb e tabatin un salario separa ta core via Serlimar como notulista ora di reunionnan di directiva. E no tabata presenta na reunion mes. Kiermen tur luna su salario extra via Serlimar tabata drenta y trahando na SVb. Asina tambe Oduber tabata pone su mes na altura di tur locual ta papia y dicidi den reunionnan di directiva.
E ex mandatario ta purba di tur forma pa retene control den partido y asina tambe den proyectonan di comstruccion, pero Minister Tromp no ta dunand’e un chens. A inventa un “task force” bou capa di Covid-19 pa controla trabounan di construccion pero ey tampoco no ta brind’e mucho oportunidad pa mete.
Probablemente Otmar Oduber a imagina su mes cu Marisol Tromp lo bira Minister pero e lo sigui “na poder”. Asina cu el a ripara cu e fli ey no ta subi, e relacion a daña. Awe ni Oduber ni Bikker no ta papia mas cu Minister Marisol Tromp. Ademas Allan Howell tampoco ta contento cu Minister Marisol Tromp pasobra el a perde e contract di trabounan di siguridad na Serlimar.
Otmar Oduber a cuminsa scrutina e statutonan di POR den tur forma pa wak den ki forma e por kita Minister Marisol Tromp for di caminda. Si logra esaki nifica cu Joselin Croes lo haya su luga. Joselin Croes no kier keda Washington mas como Minister Plenipotenciario. Despues di tabata ansha pa bira mandatario di Aruba na Merca, awor parce e kier regresa Aruba.
Tambe a tuma nota cu ta bay cuminsa atende cu e cumbre di POR pa asina scoge e lider nobo pa POR. Andin Bikker kier bira lider pero Allan Howell tambe kier. Ta un tutu completo tin y por bisa cu POR no ta un partido mas pero awor a bira un TimeBomb.
E situacion cu tin actualmente ta duna mas un indicacion cu e lo bira pio. E dianan nos dilanti lo tende mas di e desaroyonan aki cu ta confirma cu den POR tambe tin candela y cu vlamnan grandi.
