Pa decadanan largo a scucha diferente politiconan papia riba introduccion di e ley di
financiamento di partidonan politico. E pregunta cu ta surgi inmediatamente ta; ki importancia un ley asina lo por tin pa nos comunidad? Un di e risiconan di mas grandi ta e acceso na fondonan publico y enrikece famia of amistadnan door di duna fabornan
politico.
Ta conoci cu un partido politico y un politico, ta ricibi donacion di personanan den
comunidad of companianan. Pa un partido politico por yega na su fondonan, mester organisa diferente tipo di fundraising pa por genera e fondonan necesario, pa por desempeña su rol den comunidad y mundo politico. Esaki ta algo hopi comun na mundo henter. Hulanda y Aruba no ta un excepcion riba esaki.
Anchelino Vrolijk a aparece riba lista di Partido POR den eleccion na september 2017 riba number # 20. E docente a haya solamente 22 voto riba su nomber.Ley di financiamento politico na Hulanda
Na Hulanda ta existi e ley di financiamento pa partidonan politico, unda cu tur aña partidonan politico mester entrega un relato financiero na Minister di Asuntonan Interno.
Den e relato anual aki ta raporta informacion concreto di tur esnan cu a contribui cu un suma minimo di 4.500 Euro of mas. Tambe por observa donacion haci na politiconan individual. No unicamente donacion, pero tambe debenan cu por existi di un partido politico. E meta di dicho ley aki ta pa duna transparencia den e manera cu partidonan politico ta yega na nan fondonan, pa asina preveni cu hende por ‘cumpra’ of influencia un politico, pero tambe pa preveni (e aparencia di) conflicto di interes.
Commissie Toezicht Financiën Politieke Partijen, cu ta e comision cu ta eherce e control riba cumplimeto di e ley di financiamento di partidonan politico, a informa cu mayoria partido politico a cumpli. Pero tambe nan a duna di conoce cu algun sea no a entrega nan relato, no a haci esaki di e manera corecto of no a inclui relatonan di e candidatonan individual. Despues cu e comision a sigui insisti serca e partidonan aki pa duna e informacion necesario/corecto, e partidonan a cumpli. E comision ta di opinion cu fundacionnan cu tin como meta pa yuda financia campañanan politico, tambe mester wordo obliga pa duna relatonan financiero.
Sistema di financiamento pa partidonan politico na Aruba
Aruba ta un comunidad hopi chikito. Di un manera of otro, tur hende na Aruba ta conecta na otro. Esey ta haci cu un politico na Aruba por ta hopi vulnerabel na soborno y mester existi e instrumentonan pa no unicamente proteha un politico, pero tambe evita corupcion den nos aparato gubernamental. Politiconan na Aruba ta ricibi donacion via nan propio fundacion of riba nan nomber personal.
Experencia na Aruba a demostra cu ningun persona no ta duna algo sin spera algo bek. Pa yuda na kibra e ciclo aki, e ley di Financiamento di Partidonan Politico lo mester por conoce luz di dia pronto. Den e Ley di Financiamento di Partidonan Politico no solamente ta regula e parti di regulacion pa e partidonan politico, pero tambe e diferente dependencianan cu wordo crea for di e partidonan. Dus pa conclui, un ley di e indole aki no lo conta unicamente pa un partido politico y su candidatonan, pero pa organisacion completo y su subsidiarionan.
