Partido POR kier kita autonan RHD for di riba caminda

9

Consehero principal di Ministernan di Partido POR den Gabinete Wever-Croes, Serge Mansur, awe a publica su conseho na Gobierno MEP/POR/RED pa kita e asina yama autonan RHD for di caminda. Serge Mansur den su conseho ta bisa cu e ta importante pa “nos” Gobierno dicidi pa atende e issue di e asina yama “RHD”.

No ta un coincidencia, Serge Mansur ta bisa, cu den paisnan cu ta core na man rechts e stuur ta links y vice-versa. Serge Mansur ta sigui bisa cu salud y bida di nos ciudadanonan mester ta mas importante cu cualkier otro concideracion.

Serge Mansur, tesorero ora a funda POR ta sigui conseha su Gobierno: “Ta logico cu si a cobra invoerrechten riba un auto no por haci’e ilegal di un dia pa otro, pero por lo menos cuminsa e proceso pa kita e cosnan aki for di riba nos careteranan”. E conseho aki pa kita e autonan RHD for di caminda, Serge Mansur a publica tambe riba su plataforma di red social.

Na Aruba tin mas di 8000 di e autonan aki riba caminda cu ta pertenece na famianan cu un presupuesto limita. Gobierno anterior e tempo aya a opta pa no actua contra e autonan RHD.

No ta conoci ainda ki dia ta cuminsa actua contra e autonan RHD y kitanan for di caminda manera cu e Consehero di Gabinte-Wever Croes ta propone. Hecho ta cu e Ministernan encarga tur dos ta di partido POR, esta Otmar Oduber, cu ta Minister di Infrastructura cu ta regarda caretera y DTI cu ta determina cua auto ta haya keuringskaart pa ta riba caminda y e otro ta Minister di Husticia, Andin Bikker, cu tambe tin e poder pa ehecuta e conseho di nan consehero Serge Mansur.

Esey kiermen cu por spera algun decision bastante rapido pa kita e autonan RHD for di caminda.

Serge Mansur tabata riba lista di Partido Democracia Real den pasado pero a opta pa bay den fundacion di Partido POR pero no a subi lista como un politico activo.