Partido MEP a topa votadonan di San Nicolas

Den sala di Scol di Arte na San Nicolas, partid Movimiento Electoral di Pueblo (MEP) a topa cu su votadonan di San Nicolas pa un reunion informativo riba e ultimo desaroyonan den gobernacion y politica. Por lo menos 4 Minister di e Gabinete Wever-Croes a duna acto di presencia y a contesta e publico presente.

Simpatisantenan a scucha Ministernan Glenbert Croes, Chris Romero, Xiomara Ruiz-Maduro y Evelyn Wever-Croes cu atencion. A elabora riba e problemanan cu a hereda di gobierno anterior y tur e pasonan cu a tuma y dicon mester a bin cu crisisheffing temporario.

Despues a elabora riba e vision. Glenbert Croes a elabora riba e vision pa crea cupo di empleo y proteccion pa yiunan di tera; tambe el’a elabora riba e alivio pa problemanan social pasobra nunca nos mag lubida e caso di Rishandroh y Eugene.

Minister Chris Romero a elabora riba e Fast Ferry y e posibilidadnan cu esey lo trece pa San Nicolas. Tambe riba e plannan pa cu agricultura y importacion di carni di Colombia p’asina baha costo di bida.

Minister Xiomara Ruiz-Maduro a elabora riba e pasonan pa baha costo di bida y control di prijs. Tambe riba e incentivonan economico pa Aruba en general y San Nicolas en especial.

Minister President Evelyn Wever-Croes a splica e status di e refineria  y a elabora riba e plannan pa trece bida bek den Centro di San Nicolas.

“Imagina bo un centro yen di bida, cultura y desaroyo economico. Parti di e muraya di Lago basha abou y bista pa lama cu un boardwalk cu restaurant y promenade, caminda e Fast Ferry ta yega. Un desaroyo unico pa Aruba na San Nicolas. Esey ta nos vision y cu poder di Dios nos lo logra”.

Na final di e reunion e Ministernan a atende e publico presente den combersacion individual. Un bon reunion den ambiente positivo y constructivo. MEP realmente a trece speransa bek den San Nicolas.

San Nicolas pa hopi eleccion caba ta un districto generalmente berde. E ultimo eleccion MEP a bay dilanti pero toch no suficiente pa supera AVP. Es mas, su candidato principal pa San Nicolas, Chris Romero ta un di e unico candidatonan riba lista cu a bay atras den voto, siendo casi tur otro a bay dilanti.

Den eleccion 2017, partido MEP a logra 5458 den e districtonan pariba di brug, mientras AVP a logra 6643 voto pariba di brug.

E sala den cual a yama e reunion awenochi no tabata mucho grandi y como tal no por a midi forsa suficiente cu e partido di oposicion, cu a organisa un reunion informativo na YMCA San Nicolas, den e mesun caya y na mesun ora.