Dr. Horacio E. Oduber Hospital a organisa e “4th Wound Care Symposium”, cu e tema “Rooting for success in Advanced Wound Care”. Durante e simposio aki participantenan a ricibi hopi informacion riba cuido avansa di heridanan. A conta cu oradornan local y internacional, kendenan tabatin hopi informacion pa comparti cu tur esunnan cu ta traha den cuido. E aña aki e simposio a conta cu 300 participante compara cu e simposio anterior cu tabatin 200 participante.
Director di Cuido di Hospital, Ezzard Cilié a duna di conoce cu nan a cuminsa cu e Wound Care Symposium basta aña pasa y a purba di organisa esaki cada 2 aña.
Den hospital tin varios specialista ta yudando den e parti di cuido di herida y pa cu esaki a laga nan papia riba nan experticio durante e simposio. El a indica cu Aruba ta encabesa den esaki y otro islanan ta depende cu hospital lo comparti cu nan riba esaki. Boneiro y Corsou cada bes t’ey mas y nan a amplia y bay mas leu compara cu e otro islanan. “Esey ta reconocemento nos ta haya p’e, incluyendo peticion cu nan ta pidiendo pa nos start un Wondpoli ayanan”, el a duna di conoce. Boneiro y Corsou ta competiendo pa mira ken lo cuminsa prome y pa cu esaki hospital a ofrece nan experticio.
Ciruhano y coordinador medico di Wondpoli, dr. Yuri Casseres a duna di conoce cu e simposio tabata exitoso, unda cu e biaha aki tabatin mas participacion cu e añanan anterior. E biaha aki a bin cu oradornan di Merca y Puerto Rico cu a eleva e interes bou di e participantenan. A ripara cu e nivel di e simposio a subi cu un duracion di 2 dia. E prome dia tabata e parti “hands on”, unda cu e participantenan por a hinca den practica e verband y gips despues di e charla cu nan asisti. E di dos dia e participantenan a ricibi charla di oradornan local y internacional. Dr. Casseres a duna di conoce cu e cuido di Aruba a haya un tratamento special e biaha aki.
Dokter di cas, Melissa Wever a haya cu e simposio di cuido di herida tabata uno hopi bon. Durante esaki nan a ricibi informacion di diferente hende, pero tambe tabata a recorda nan riba e parti importante cu ora tin herida, specialmente pashentnan diabetico pa tuma contacto cu Wondpoli y specialista. Tambe el a expresa cu a refresca su memoria cu otro topiconan importante. Esaki ta di dos biaha cu e ta participa den e simposio di hospital y Melissa Wever a haya tur dos bon. Durante ambos simposio el a mira cu cada biaha nan ta pone enfasis riba loke ta importante.
Stephanie Arends-Lesire, assistent di dokter di cas John Croes, a participa pa prome biaha den e Woundcare Symposium y el a haya esaki algo bon. E simposio tabata educativo, a ricibi hopi informacion y nan a ricibi hopi tip con pa traha cu pashentnan. E ta sinti cu tur loke el a ricibi, e kier comparti esaki cu su coleganan. Tambe nan ta hopi emociona cu tur informacion ricibi pa asina nan por siña mas y yuda otro hende.
Dr. Jeannouel van Leeuwen ta un ciruhano na Corsou y tambe a participa den e simposio di hospital. El a duna di conoce cu e simposio tabata fantastico y Dr. Casseres ta haciendo un bon trabou hunto cu su team door di amplia conocemento con pa handle cu un clinica pa herida. Dr. van Leeuwen a expresa cu e mes ta siñando mas di Dr. Casseres riba e spirito di team y disciplina, pero tambe e parti multidisciplinario cu e ta duna den tratamento di herida. Esaki ta algo admirabel y Dr. van Leeuwen lo kier mira cu na Corsou e Wondpoli bira mesun avansa manera esun di Aruba.
