Diabierna anochi pa manece diasabra a tuma luga e di 30 edicion di Ronde van Aruba. E evenemento di careda, organisa pa Marinierskazerne Savaneta, ya ta existi desde 1971. Dos marinier un tempo pasa a reta nan mes pa core ‘solo’ rond di nos isla. Desde e tempo ey esaki a crece bira un evenemento cu ta ripiti tur aña. Distancia pa esaki ta 72 kilometer di largura, locual pa gran parti ta sigui a lo largo di costa di e isla y ta un di e caredanan di mas pisa y largo den Region Caribe.
Den palabra di Lana Gobert, atleta cu a kibra record pa e single runner den Ronde van Aruba, a conta cu e clima tabata na fabor di nan, pero ora cu el a yega den e seccion di Arikok, el a cansa debi na tur e seronan. Gobert a bisa cu dado momento el a hasta bira nervioso, pero e tabatin su team den auto su tras y su yiu muhe tambe tabata den nan. Pa es motibo e tabata sa cu e no por a stop, “mi mester a mustra cu asina bo cuminsa, bo tin cu caba.”
Na su turno, Kiara van Trikt, atleta cu a core den ekipo, a conta cu nan a core e distancia den shete ora y diestres minuut. Segun van Trikt, nan a purba train, pero e obhetivo tabata mas bien pa complete esaki. Segun el a sigui splica, specialmente e di dos parti tabata mas mental y cu si “bo pone bo mente na dje, bo por yeg’e anto e ta pone bo sinti bon.” El a termina bisando cu e ambiente sigur tabata uno ameno y cu el a keda satisfecho cu e resultado.
Por ultimo, Richard Rodriguez, coredo legendario, a splica cu e tin basta aña ta soña y anticipa e momento pa caba e Ronde van Aruba. “Y m’a logr’e kiermen mi ta contento cu mi a cab’e.” Rodriguez a conta cu el a haya algun complicacion den santo blanco ora cu su pianan a bola, pero asina mes el a keda pusha y lucha y asina e logra yega e final. Sosten y apoyo di su famia sigur a aporta na su logro y a dun’e e animo necesario pa termina e careda.
