Luna di november, Parokia Cristo Rey di Brazil ta di fiesta. Nan ta celebra nan Fiesta Patronal, Fiesta di Cristo Rey. Hunto cu esey, door cu Fiesta di e Birgen di Chiquinquira ta dia 18 di november, e parokia a duna un espacio tambe pa celebra mama di Hesus, Birgen Maria, Birgen di Chiquinquirá.
Diabierna, Parokia Venezolano a bin hunto y asina e celebra nan patrono, Birgen di Chiquinquira, cual e aña aki ta e di nuebe aña cu nan ta celebr’e. E comunidad Venezolano, tur aña ta prepara, nan ta trece nan ofrenda, ta prepara un mantel. Segun e pastoor, ta algo hopi bunita pa wak con e celebracion aki ta uni e comunidad Arubiano hunto cu comunidad Venezolano den un celebracion asina bunita, pa honra mama di Dios.
Na Aruba tin hopi hende cu ta deboto na e Birgen di Chiquinquirá. Hopi aña atras, tabata tin hopi Arubiano cu tabata bay Maracaibo, pa asina celebra e fiesta aki. Ya pa nuebe aña caba e celebracion ta tuma luga den e Parokia di Cristo Rey.
Na ultimo, Pastoor Andry, a pidi pa uni den famia, pa ta uni den bista di Dios. Den union por logra hopi cos, separa for di otro no. Ora cu e mama di Dios a aparece, esey tabata su intencion. Pa tin union den e pueblo, pa sinti cu nos tur ta yiu di Dios y cu Dios semper ta percura cada un di nos.
P’esey, den e proximo temporada di Advent, nos tin un oportunidad pa trece union familiar den presencia di Dios.
