Parlamentonan tratando Venezuela; Structura estatal y SDG’s durante IPKO

Lider di Fraccion di POR den Parlamento, drs. Marisol Lopez-Tromp ta forma parti di e delegacion di Parlamento di Aruba cu ta na e momentonan aki na Hulanda pa atende e reunionnan Interparlamentario di Reino Hulandes (IPKO). E ta informa cu e reunionnan aki ta hopi interesante pasobra parlamentarionan ta reuni y atende diferente tema di interes pa tur.

E biaha aki, mescos cu den otro ocasionnan, un di e temanan cu ta resalta ta e situacion na Venezuela. Cada pais a presenta kico ta nifica pa nan e crisis den cual nos pais bisiña ta pasando y por bisa cu Aruba ta e pais mas afecta y a indica kico e consecuencianan ta pa nos isla.

Sustainable Development Goals (SDG), esta metanan di desaroyo sostenibel den Reino Hulandes, tambe a haya atencion y a wak con leu cada pais ta pa loke ta e metanan aki. Marisol Lopez-Tromp ta forma parti di e grupo di trabou di SGD riba integridad, cual ta un topico di interes grandi den Reino Hulandes.

Diaranson atardi tabatin presentacion di diferente profesornan tocante Structura Estatal den Reino Hulandes, riba con esakinan a bay a lo largo di tempo, e relacion cu Statuut y con e ta relata na e parti di ‘geschillen regeling’ cu lo bay wordo trata tambe.

Lopez-Tromp a indica cu tabata un atardi sumamente interesante y fructifero pa loke ta e parti aki unda cu sigur ta contribui na lo cual lo ta e reunion cu lo tuma lugar den e proximo dianan tocante ‘geschillen regeling’.