Awe mainta ta cuminsa e reunion den cual e fraccionnan di MEP, POR y RED ta cla pa termina nan confiansa den Minister Marisol Lopez-Trompz e mandatario a yega prome cu 8:00am na Parlamento, compaña pa director y hefenan di varios departamento y companianan sui generis di Gobierno. E ta determina pa defende su mes y su maneho.
E Parlamentarionan a bin cu e pensamento pa caba e reunion den mey ora, mientras cu e Minister a bin cu documento pa comparti y prueba su “hefenan” awe cu e ta combatiendo corupcion pisa cu tereno. E Parlamentarionan cu ta sostene Gobierno ta mira esaki como un reunion simpel; sea tin confiansa of no. Di otro banda Lopez-Tromp ta insisti cu e ta para pa integridad. Y como cu tin decisionnan tuma prome cu su tempo cu ta carece di integridad, cu awor ta papia di falta di confiansa.
Ta parce cu si coalicion para awe pa confiansa, ignorando corupcion, cu nan lo haya un mancha cu sin duda lo bira dificil likida entre awo pa eleccion, programa pa september otro aña.
Mocion di desconfiansa den Parlamento no ta nada nobo den nos sistema politico. Na varios ocasion a yega di presenta mocionnan asina pero nunca den historia politico di nos pais, un mocion asina a yega di haya sosten. Semper e ministernan a sobrebibi e mocionnan aki. Ta parce cu awe pa prome biaha den Parlamento, cu mayoria lo sostene e mocion y asina “kita” e minister for di trabou “op staande voeten”, como cu su partido mes no ta confie. E motibo dicon nan no ta confie, e hecho cu tin candidatonan riba lista bou investigacion disciplinario y penal, no ta conta awo pa e mayoria, djis cu POR no ta confie!
Tin hopi interes pa e reunion di awe, cu 24ora.com lo transmiti tambe riba nos pagina y rednan social.
