Awe diasabra 3 di februari 2018 ta exactamente 3 luna cu a sosode un caso cruel di asesinato na De Vust, den e casnan di pueblo. Aki un mama a yega cas y a haya su yiu muhe morto. Te cu nos sa, e caso ta habri ainda y keto bay no tin detencion, pues Polis no a yega na e culpabel! Esaki a pone cu awe Parlamentario Sue-Ann Ras (MEP) a manda un advertencia na Polisnan, cu e casi aki sigur lo no por keda sin solucion.
Asesinato den dia cla
Tabata riba 3 di november 2017 den oranan di merdia cu a yega topa cu e curpa sin bida di Sarahi Sierra na su cas. E mama a bati alarma pero na yegada di Ambulance no por a haci nada. Testigonan e dia ey a papia di un caso cruel. Dr. Giel a constata morto di e hoben, kende a bay laga un yiu homber chikito atras.
E victima ta masha conoci y su asesinato a causa masha dolor, no solamente cerca famia, pero tambe cerca su amiganan. Tur hende ta demandando contesta riba nan preguntanan, pero envano. Ta zona imposibel pa un of mas hende comete un “perfect crime” den pleno luz di dia, den un area habita cu casnan di pueblo, sin cu ningun hende por a mira algo, scucha algo of cu SA algo.
Caso no por muri
Parlamentario Sue-Ann Ras, un ex-docente di scol, ta determina pa no laga e investigacion muri. El a bisa awe cu “Awe ya ta 3 luna cu a ranca Sarahi Sierra cruelmente di su famia. Nos ta keda carga tur speransa y fe cu nos Cuerpo Policial TA resolve e caso cruel y doloroso aki, sino mi ta perde tur credibilidad (cu por cierto no ta mucho di gaba caba) den inteligencia y profesionalismo di nos hendenan. Mi ta NENGA absolutamente pa acepta cu NO por resolve e caso aki”.
E miembro di Parlamento ta demanda husticia pa Sahari y ta subraya cu ta prohibi pa lubida e caso aki cu keto bay ta bou investigacion.
E investigacion no ta cla ainda
For di fuentenan bon na altura di e caso specifico aki nos a compronde cu ainda no por papia di un caso lubida. “Recherche ta bezig cu e caso y berdad el a dura un poco, pasobra e ta bastante complica y delicado, pero kere mi, nos tin bon informacion y nos lo finalisa e caso aki pronto. Lo bin mas claridad den e simannan nos dilanti”, asina e informante a garantisa nos awe.
Presion politico riba e aparato hudicial
Siendo un pais cu un democracia Parlamentario, nos sistema ta funciona den un asina yama “Trias Politica”. Parlamento hunto cu Gobierno ta traha ley (poder legislativo). Gobierno (Gobernador y Ministronan) ta ehecuta e leynan aki (poder ehecutivo) y Hues ta huzga si ta aplica e leynan bon (poder controlador). Pues no hopi biaha e podernan sa cuestiona otro, pero probablemente e tardansa y presion di votadonan ta haci cu e Parlamentario (Poder Legislativo) ta adverti e poder hudicial cu no por laga un caso asina muri. El a confirma tambe cu e tin un confiansa limita den e forma con autoridadnan ta atende cu e tipo di casonan penal asina.
Parlamentario Sue-Ann Ras
Sue-Ann Shamira Juliette Ras, di 42 aña di edad, procedente di Savaneta, ta mama di 4 yiu, esta 3 yiu muhe (1 adopta) y 1 yiu homber. El a studia “Fashion Marketing & Merchandising” na International Fine Arts College na aña 1993. Na aña 1998 a studia na Instituto Pedagogico Arubano (IPA) como “Docent 3de graads”, mientras cu na 2002 a studia na IPA atrobe pa “Docent 2de graads” specialisa den nos idioma Papiamento. Awendia e ta Parlamentario den Fraccion di MEP representando su 362 votadonan y henter comunidad den e organo mas halto di nos pais.
