Parlamento ta pidi Gobierno splica kico ta nifica “bond”

1212

Parlamentario Alan Howell durante su disertacion diahuebs den sala di Parlamento, den cual Minister Xiomara Maduro a presenta e di dos uitvoeringsrapportage 2020, a expresa cu Minister di Finansa a splica pueblo den palabranan hopi cla y raspa y den un idioma facil riba e topico aki.

Alan Howell (POR) ta inica cu un di e preguntanan cu e ta haya for di pueblo ta si Minister di Finansa por splica den detaye kico exactamente ta bond, esaki pasobra tin hende ta pensa cu ta placa di pensionado ta bay eynan, of placa di otro caminda, pero en realidad ta cu cualkier persona cu tin moda di cumpra bond por solicita pa cumpra. E ta pidi pa Minister Maduro splica den placa chikito con e proceso di cumpra bond ta bay, ken ta cumpra bond y ken no por cumpra bond pa pueblo por haya un bista corecto.

Continuando e parlamentario di POR a indica cu tabata mirando den direccion di un surplus di 46 miyon, pero cu lamentablemente mundo a haye confronta cu un crisis, ningun hende a sper’e y e no a bin cu manual. “Paisnan mas grandi cu nos ta den situacion dificil, no por saca nan som y pa tal motibo aki, no pasobra ta e gobierno aki, mi ta orguyoso, como Arubiano. Expertonan di Corsou a duna un pluimpje na e forma cu Aruba ta atendiendo e caso aki, e forma cu Aruba ta atendiendo cu e presion cu Hulanda ta buta. Nan ta duna e gobierno aki un pluimpje pa ta e role model cu segun nan Corsou, Sint Maarten y otronan mester a atende cu e caso cu tin di haber cu Hulanda”.

Despues di esaki Howell a haci un otro pregunta: El a compronde cu e bondnan a wordo bon bendi, cu tin forma pa hala rosea na september y october. Pero e kier sa awo, teniendo esaki na cuenta, con Minister di Finansa ta premira cu nos lo ta para pa november y december y con nos lo ta para pa ora aña habri? Si nos mester bay bek na merced di Hulanda of ta mira un otro solucion den horizonte? 

Finalisando, Alan Howell a expresa cu Parlamento en general a para duro pa no acepta cierto di e exigencianan cu Hulanda tin, cual e ta haya un bunita forma di para hunto. “Mi ta di opinion cu si nos keda cu e caracter firme aki, nos lo planta respet y probablemente tambe Hulanda lo sa di bin na mesa na un forma mas trankilo y respetuoso, pa asina nos sali for di esaki. Nos mester di yudansa, nos no ta nenga esey, pero nos mester haya e respet, mester tin respet mutuo pa nos sali for di esaki”.