Parlamento ta dividi riba interpretacion di reunion awe na Hulanda

3418

E opinionnan awe riba e reunion di Conseho di Minister di Reino tabata mixto. Manera lo por spera, e Fraccion di AVP (oposicion) ta sinti cu Minister President di Aruba ta cla pa acepta e pakete caba di condicion, no obstante tur e medidanan cu lo bin cu ne pa pueblo, mientras Corsou y Sint Maarten si ta para duro riba nan “no”. Di otro banda, Presidente di Parlamento, procedente di e partido MEP ta haya cu e prome mandatario di Aruba a haci un bon trabou na Hulanda, mientras cu Daphne Lejuez di (Ex-MEP) tambe ta sinti cu tanten cu ta dialogando ta progresando. E ta convenci cu nos no tin mucho opcion awor cu ta di acepta e condicionnan pero negosha e implementacion.

Awe mainta trempan a cuminsa e reunion di Conseho di Minister di Reino Hulandes den cual mester a atende cu e di tres transhe di fiansa pa Aruba, Corsou y Sint Maarten. Pa por bini na remarca pa e fiansa, den caso specifico di Aruba, pa un suma di 204 miyon florin, a pone un lista di 18 condicion. Aki na Aruba gremio sindical y politico ta sostene Gobierno pa no acepta e condicionnan mientras cu gremio comercial ta sini cu mester tum’e sino no tin placa pa cubri loonsubsidie y FASE y como tal lo por laga e pueblo sin pan riba mesa e luna aki.

Parlamento ta dividi riba interpretacion di reunion awe na Hulanda

Parlamento ta dividi riba interpretacion di reunion awe na Hulanda; Nos ta scucha opinion awe di AVP, MEP y Parlamentario independiente Daphne Lejuez

Posted by 24ora on Friday, July 10, 2020

Pero parce cu Gobierno a logra haya poco dia mas pa na Hulanda, sinta na mesa cu e partidonan envolvi, pa convence nan cu Aruba no tin problema cu e puntonan treci, pero e forma di su implementacion y sin participacion di Aruba, ta locual no ta elegante y como tal no ta aceptabel.

Marlon Sneek a drenta arena politico na aña 2005 ora el a subi lista di partido AVP. Den su prome salida, el a saca no menos di 256 voto. Den eleccion na 2009 el a bay dilanti y a haya 304 voto. Asia den eleccion di aña 2013 el a sigui crece y yega 441 voto, mientras cu den ultimo eleccion na aña 2017 el a baha den voto y a keda cu 351 voto riba su nomber. Sneek ta procedente y ta biba keto bay den Dakota y ta un docente, cu a dedica hopi aña na enseñansa. Desde aña 2017 e ta ocupa e funcion di Lider di Fraccion di AVP den Parlamento.

Marlon Sneek, Lider di Fraccion di AVP den Parlamento

“Nos por a mira cu nada no a cambia, sigur ora nos lesa e carta cu Secretario di Estado Knops a manda pa Parlamento di Hulanda, informando nan di e reunion di awe. El a skirbi cu Corsou y Sint Maarten no a acepta e proposicion riba mesa. Y Aruba a pidi un chens pa e por bay convence su Parlamentarionan y su hendenan pa e acepta e pakete. Dus e ta bisa cu Hulanda lo sigui e combersacionnan cu Aruba riba e proposicion aki den e siguiente dianan, cu miras pa tuma un decision den e siman nos dilanti”, asina Lider di Fraccion di AVP den Parlamento, Marlon Sneek a bisa nos awe tardi den un entrevista dilanti edificio di Parlamento.

Parlamentario Marlon Sneek a sigui bisa cu por a nota e prome reaccion cu a sali tanto for di AVP como tambe di e coalicion cu ta sostene Gobierno den Parlamento, cu nan lo no acepta e pakete manera presenta. “Pero nos Minister Presidente a pidi Hulanda un chens pa e por bin Aruba pa convence Parlamento pa tum’e toch. E ta evaluando awo den detayes kico tur e pakete aki ta encera pa e convence su Parlamentarionan pa acept’e toch”, segun Sneek.

Fraccion di AVP a vocifera cu ya caba nan tabatin e scenario aki den miras caba. Den nos concepto ya nos a mira adelanta caba cu Gobierno tabata cla pa tuma e pakete. “Na momento cu el a mira cu entodo caso Minister Presidente di Corsou y di Sint Maarten a bay, esey a pone cu e no por a keda sin bay y a hay’e obligatoriamente ta bay Hulanda. “Pero su pensamento pa tuma e pakete aki tabata conoci caba y awe por mira den e besluitvorming di Rijksministeraad caminda Corsou y St. Maarten a keda para riba nan punto, bisando e ta inaceptabel, mientas cu Minister President di Aruba ta pidi oportunidad pa por bay bek Aruba y busca un base amplio pa Parlamento por sostene e pakete toch”, asina Marlon Sneek a subraya.

Sneek a bisa cu tin un diferencia grandi entre Aruba y Corsou. E Minister Presidente di Corsou a sali bisa cu nan NO ta acepta e pakete. E no tabatin mester di sosten pasobra t’e ta Gobierno y ta p’e pueblo a vota, pues el a sali para riba su punto. Aki na Aruba e Minister Presidente a invita gremionan den ballroom di hotel pa mustra nan presentacionnan masha bunita pa purba convence gremionan pa sostene pa e tuma e pakete toch, sin tene cuenta e medidanan pisa cu e pakete ta bin cu ne.

mr. Juan Edberto “Ady” Thijsen tin 61 aña di edad, ta casa y tin 4 yiu y 2 nieto. El a studia ley y ta un abogado di profesion, specialisa den leynan laboral y derecho constitucional. El a drenta arena politico na aña 2005 ora a subi lista di MEP. Den su prome salida el a logra 818 voto, esun mas hopi te dia di awe! Den eleccion na aña 2009 el a cay den voto y a yega 414 voto, net mita. Den eleccion di 2013 el a crece y yega 475 voto mientras cu den e ultimo eleccion na 2017 el a bolbe crece y a yega 511 voto riba su nomber. Desde 2017 e ta ocupando e puesto di Presidente di Parlamento di Aruba, aunke cu su preferencia lo tabata e puesto di Minister Plenipotenciario di Aruba na Hulanda, pero esey no a logra.

Presidente di Parlamento, mr. Juan “Ady” Thijsen (MEP)

“Mi ta hay’e bon, te unda m’a tende anto. Pasobra, ya…den tur e añanan aki, nos a conoce tur e desaroyonan cu tabatin tocante e asunto aki. E delaster tempo a mira cu Hulanda a pone hopi presion, no solamente riba nos, pero tambe riba Corsou y Sint Maarten. Pero Bo ta ripara si cu pa loke ta Aruba, a cambia nan posicion si awo, enbes di do or die, awo ta sinti cu a cambia un poco di posicion y nan a bin compronde cu Aruba ta riba un bon caminda”, asina Presidente di Parlamento, mr. Juan “Ady” Thijsen, a duna di conoce durante un entrevista awe.

E Presidente di Parlamento a sigui bisa cu “Mi a scucha Staatssecretaris Knops bisa hopi duidelijk cu berdad tabatin 8 aña di mal maneho. El a bisa esey. Esey a trece Aruba den hopi problema. Pero el a bisa cu ora Gobierno a cambia na 2017 cu a bin cambio y cu lo tabatin un surplus di 46 miyon den presupuesto di aña 2020. El a admiti cu e problema a sinta na Covid y cu nos lo por yega na consenso pa sali for di e situacion awor”, asina Thijsen a splica. E mes ta kere mas den un protocol en bes di un Ley di Reino di Consenso.

“E mas importante ta pa Aruba lanta bek, pa nos tur. Anto esey mester bin prome. Cu mester bin reforma no ta problema. Ami ta pro reformanan”, di acuerdo cu Ady Thijsen awe. “Mi ta kere cu berdad e Covid ki a pone cu bida ta bay cambia full, pero hunto nos tin cu hacie. Ami no tin problema cu esey. Ami ta kere si cu Bo no por implementa tur cos awo. Bo tin cu compronde cu e pais pocopoco mester lanta bek. Mi ta elogia nos Minister Presidente pasobra e ta haciendo un tremendo trabou. Mi ta contento tambe cu den Parlamento nos a uni pa e causa aki”, asina e Presidente di Staten a sigura. E ta kere cu nos no a yega ainda, pero e tin confiansa cu Aruba lo sali afo y drecha e pais aki.

Daphne Lejuez tabata Presidente di Camara di Comercio y despues a dicidi di afilia na partido MEP na aña 2017. Daphne Lejuez, cu durante e ultimo eleccion na 2017 a logra 196 voto, a demostra di ta un Parlamentario critico y hopi bes pendiente di comercio y economia di nos pais. Desde november 2019 el a bira independiente den Parlamento, haciendo asina cu Fraccion di MEP ta baha for di 9 asiento pa 8 asiento.

Parlamentario independiente Daphne Lejuez

“Mi tin cu bisa cu at least e ta positivo cu Minister President a keda ainda un par di dia mas y cu tin espacio pa dialoga. Mi ta kere esey ta hopi positivo, en bes di sali cu un NO, e tin espacio pa dialoga, tin un luz na horizonte pa nos por yega na un acuerdo y tambe yega na e fondonan necesario”, asina e Parlamentario Daphne Lejuez a splica awe tardi. Cu e carta di Secretario di Estado Knops despues na Parlamento Hulandes den cual e ta bisa cu Aruba a pidi mas dia pa bay convence su Parlamento, e Parlamentario di Aruba ta considera esaki tambe positivo, probablemente cu Ministerraad y gremionan na Aruba pa papi’e.

“Pero mi ta kere si cu cualkier momento cu Bo ta den negociacion, kiermen di cu Bo tin di bay acept’e. Knops tabata hopi duidelijk cu aceptacion, pa nos por sigui papia, kiermen pa nos sigui papia Bo tin di acepta e RFT y e entidad. Awo loke ta wordo negocia awo ta e contenido con esakinan ta bay ta, pero e hecho cu nan t’eyh bin ta un condicion cu no por desvia for di dje”, segun e unico Parlamentario independiente den Parlamento di Aruba a bisa.

“Mi ta desea nos Minister Presidente hopi exito den su negociacionnan. Mi ta kere cu awor no ta e momento pa pensa riba politica of e parti di ken si y ken no. Awo ta ora pa pensa riba interes general di nos comunidad. Pensa con ta yega na e placa pa fin di luna pa paga FASE y Loonsubsidie”, di acuerdo cu Lejuez. El a finalisa cordando tur hende cu a lesa e pakete aki caba, cu locual ta ofrece den e pakete, e crecemento economico. “Si Bo lesa e pakete pa nos pais, riba tur mes locual tin poni aden, NO ta malo. Ta cosnan cu nos ta trahando riba dje caba of tabatin pensa di traha riba nan. Dus e no ta malo, mester bay wak kico ta e implicacion di e entidad nobo y con e lo funciona”, asina Daphne Lejuez a termina bisando.