E prome debate publico (vragenuur no.1) pa aña 2026 na parlamento a tuma luga diabierna tratando e tema di trafico. A trece Minister di Husticia mr.drs. Arthur Dowers aden pa algun pregunta tocante siguridad di nos trafico y medida cu lo mester tuma. E reunion no a dura un ora si, ja despues di Minister Dowers su contestanan, pa rond di 40 minuut a cera e reunion.
Tabata un reunion cu aparentemente presidente di parlamento no a pensa dos biaha pa tene mirando tambe e urgencia di e tema e ultimo dianan cu tur loke ta pasando den trafico. “Parlamento lo keda pendiente di accionnan cu lo tuma, y cambionan pendiente pa asina garantisa seguridad di nos comunidad”, segun presidente di Parlamento Marlon Sneek.
Kico ta pasando na Aruba?
Por ehempel, segun cifranan di Forensys Aruba, pa loke ta e prome siman di 2025 a registra un total di 129 accidente. E prome siman di 2026 a registra caba 197, un aumento di 34.5% mas accidente cu aña anterior. Loke ta mustra di ta mas alarmante ta casonan di Hit and Run tambe. E cosnan aki tin hopi hende den comunidad man na cabes ta puntra: ta kico ta pasando na Aruba?
Den cuadro cu accidente fatal cu a tuma luga dilanti di Wind Creek Casino, Parlamentario John Hart (AVP) a acerca Minister Dowers pa un debate publico, y asina parlamentario a haya e oportunidad pa bini cu nan pregunta y preocupacionnan ariba e tema.
