Diabierna ultimo Parlamentarionan a haya e proposicion di cambionan den e ley di BBO/BAZV y un lista di diferente otro cambionan fiscal mas cu lo drenta na vigor dia 1 di juli 2018. E problema principal ta cu, di acuerdo cu CAFT y cu Gobierno di Hulanda, e leynan aki mester pasa Parlamento prome cu dia 1 di juni 2018, pasobra e dia ey Aruba ta riba agenda pa trata den Conseho di Minister di Reino na Den Haag, Hulanda. Cu e poco tempo cu ta resta y mirando cu e siman aki tin dos delegacion biahando, ta purbando pa pasa e ley aki entre dialuna y diamars ainda!
Diabierna ultimo a parti e cantidad di cambionan den e ley na e 21 Parlamentarionan y a pidi nan pa den fin di siman mes nan haci e preguntanan relaciona cu e cambionan den ley y pa manda pidi Gobierno contesta despues di un reunion di Comision Central di dialuna mes. Ta spera cu Gobierno contesta e mesun dia pasobra diamars kier yama un reunion publico pa vota riba e ley aki.
Claro cu den un dia no por analisa un cambio asina drastico, den cual organonan manera Raad van Advies a desconseha Gobierno pa manda e ley aki Parlamento. Nan ta considera cu e ley no ta completo y cu falta informacion y analisis profundo di e envergadura di e ley aki y su consecuencianan. Gobierno no ta sigur cu e lo haya e cantidad di placa pronostica den e ley y ni tampoco si e locual e ta duna bek ta yuda e ciudadanonan.
Carta di Raad van Advies – Crisisheffing
E iterinario di biahamento di Parlamento ta para den caminda cu tratamento di e ley importante aki. Diaranson awor un delegacion lo sali pa reunion di Parlatino mientras cu diabierna un otro delegacion lo sali pa reunion di IPKO na Hulanda. Bisando esey, desde diaranson lo no tin quorum mas den Parlamento, pues ta bira dificil pa trata un ley di e magnitud aki den cual coalicion mester di delaster un voto pa por pasa e ley.
Den caso cu e ley no pasa na tempo, Gobierno di Aruba ta core e risico grandi cu dia 1 di juni lo vota pa un “aanwijzing” den Rijksministerraad, pa falta di cumplimento.
E ta zona ilogico cu, specialmente e Parlamentarionan nobo, manera ta Rocco Tjon, Daphne Lejuez, y Setty Yarzagaray lo por ta na fabor pa pasa un ley cu un lista di cambio cu lo afecta specialmente nos pensionadonan, sin cu a scucha gremionan y sin un bon analisis.
E cambionan cu lo por spera ta:
BBO/BAZV hunto awor ta 3,5%
BAZV lo uamenta cu 1%
BPPP lo ta 1,5%
Total: 6%
E reto mas grandi ta cu e consecuencia di e aumento di BBO-BAZV na 6% lo por tin un efecto di como 10% ora acumul’e. Gobierno ta propone pa hisa e Reparatietoeslag cu e Gobierno anterior a introduci di 100 florin pa luna pa esunnan cu ta cobra salario minimo, cu lo his’e cu 25 florin mas pa luna.
Tambe e pensionadonan cu tabata haya 100 florin lo conoce un aumento di 25 florin mas, pa un total di 125 florin pa luna.
Lo baha e cobransa di AZV pa pensionadonan di 10.5% pa 6.5%, pero asina cu e pensionado tin un otro entrada banda di su pensioen di biehes di SVB, e ta perde e reparatietoesag y mester paga 10.5% na AZV. Pensa riba e pensionadonan di Gobierno cu tin pensioen di SVB y APFA of esunnan cu tin un pensioen den banda di LAGO of di Hospital of ta huur un apartamento den cura di cas.
Esaki ta e cambionan mas grandi, banda di algun otro cambio fiscal mas.
